Share |

July 27, 2006

شيخ العسكر


من دلائل ضعف أمة تدنى مستوى علمائها..وللأسف تمر الأمة الاسلامية حاليا بأسوأ مراحل ضعفها..ويتجلى ذلك فى كون "الشيخ" محمد سيد طنطاوى هو للأسف الواجهة الرسمية للمسلمين..وقبل ما أكمل ياريت ماحدش يفهم من كلامى انى باتكلم عن موضوع يهم المسلمين فقط..ولكنه يهم المسلمين والمسيحيين الغير متزمتين على السواء..فقد اعتاد الناس حين تخذلهم قياداتهم الرسمية أن يلوذوا بقياداتهم الدينية..فاذا خذلتهم أيضا فسيصير ظهرهم فى اتجاه الشارع أو فى اتجاه مشايخ الأرصفة الذين لايعلمون عن الدين أكثر مما يعلمون عن السواك وفوائد حبة البركة
يفعل ذلك الأخوة المسيحيون - ولو انها بايخة حكاية الأخوة دى-..مشيها المسيحيون على طول من غير تعبيرات الحكومة..وعلى قدر معلوماتى لايخذلهم البابا شنودة..فهو فى أضعف الايمان ان لم يتخذ موقفا اعتكف فى الدير مبديا تعاطفا...أما المفترض أنه حاليا الامام الأكبر للمسلمين فقد تفرغ لصراعات الوظيفة..وضرب الصحفيين..وفتاوى الحكومة ديليفرى....وكل ده كوم وانه يخطب الجمعة اللى فاتت فى الأزهر-أكبر جامعة اسلامية فى العالم- ليسفه المقاومة ويمنح صكوك البراءة لأصدقائه اليهود وينسخ كلمات رؤسائه عن الفوضى الهدامة والبناءة ( حد فاهم يعنى ايه فوضى هدامة؟ ) ويصف حسن نصرالله بالمقامرة وجنون العظمة بل ويتواتر أنه سب المتظاهرين بعد الصلاة ونعتهم بأقبح الألفاظ المتمشية مع تعليمات أمن مصر الجديدة وشرم...لما توصل الأمور لكده يبقى لازم نعرف الراجل ده بيمثل مين ولا بيمثل على مين؟
طب حد يفهمه غلطه ياخوانا..حد يقول له انه لابس عباية لبسها قبل منه رجال بحجم محمد عبده والشيخ شلتوت والشيخ عبدالحليم محمود والشيخ الغزالى عليهم رحمة الله..يبقى ماينفعش يوسخ العباية فى الجرى ورا فتاوى البنوك وشهادات الاستثمار والمجلس القومى للمرأة والخنوع للأجانب لاعتبارات سياسية...ماينفعش يلبسها وهو بيحضن حاخام اليهود فى قلب الأزهر و بيقول الفلسطينى مش شهيد...ماينفعش اللسان اللى المفروض يدعو الناس يدعوا عليهم..ماينفعش بدل ما تدعو للمقاومة بالنصر انك تدعوهم للتريث والخنوع ..ماينفعش ياعم الشيخ
يا مولانا انت عارف المصريين كانوا مسميين فضيلتك ايه قبل كده؟ محمد سيىء طنطاوى
طب حايسموك ايه تانى؟
يامولانا...أنت بما تفعله لا تصلح شيخا للأزهر...ونخشى عليك أن يحولونك الى شيخ للعسكر

5 comments:

فيها حاجة حلوة said...

لا عجب في ذلك فضعف المؤسسات الدينية هو امر طبيعي لتكتمل الفوصي البناءة طبعا لصالح الحكومات عرفت بقي ان في فوضي بناءة

Anonymous said...

تسلم

Anonymous said...

على فكرة حرام عليك اتهاماتك لشيخ الأزهر
كل أفعال شيخ الأزهر تم تأويلها والافتراء عليه آخرها إنه قال على نصرالله انه مجنون، والكلام ده باطل وجريدة الاخوان بتفتري على الراجل بالاعيب صحفية خايبة على طريقة إن ليها مصادر داخلية

ربنا حيحاسبكم على كلامكم ده

Anonymous said...

Best regards from NY! » » »

Anonymous said...

Excellent, love it! » »