كبر...تعيش

كبر..تعيش

قول للى محتاج لك : مفيش

اللى اختشوا ماتوا خلاص

اتعلم انت ماتختشيش

الليل هجم

وانت اللى شيدت الهرم

بتمد ايدك للعجم

شاغل دماغك مين حايحكم فى البلد

تفرق مع الأرنب فى ايه

لوراح أسد ...وغزال حكم؟

.......................

كبر بقى...هو انت فرحان بالشقا؟

هو اللى كبر كان تعب ؟ ولا اللى دور كان لقى؟

من كام سنة...شايل حضارة كام سنة

بتلف بيهم ع الجيران

تفرش ستارة قوتك...وتخبى فى الضعف اللى بان

زحف التتار على باب مدينتك

وانت تايه فى السؤال

هل ياترى

خوفو اللى بانى الأهرامات له كام ولد

مين ملكه وامتى اتولد

قبل أما تمسك فى التاريخ

امسك فى جغرافيا البلد

......................

طول عمرنا

نكتم جراحنا ف قلبنا ف أخر السنة

نكتب على وش النتيجة "عام سعيد"طول عمرنا

طول عمرنا

الحيط بيمشى جنبنا

ونغنى بكره الخير يزيد

طول عمرنا

بنبيع فى راس سيدنا الحسين

علشان يزيد

......................

حاتعيش تهادن

مرحبا

حاتعيش تناضل

مرحبين

كل اللى بيناضل مهادن

وانت بس تروح لمين

أحسن لك اهرب م الحالين

عيش بين وبين

اياك تقوم...اياك تنام

اياك تثور..اياك تحب

البس قميص الدروشة

والدم كدب

امسك بسيف المعركة....وارقص على ضهر الفرس

اشتم ف كل السجانين...واشتم فى كل اللى اتحبس

تهرب لفين؟

اسمك مجرد أمر فى جيوب العسس

...............................

احنا اللى بنفكر غلط

واحنا اللى عايشين بالعبط

احنا اللى بنموت فى المعارك.. وفى السلام

احنا اللى عايشين والسلام

احنا اللى سامعين الأوامر

احنا اللى سامعين الكلام

من "صباح الخير يامصر".. لحد قرأن الختام

احنا اللى راضيين باللى فاضل من كبار القوم

بالشمس.. وهلال الشهور علشان نصوم

أغلب من الغلب الغبى

وهمومنا بتبكى الهموم

بنعيش خفيف

وننام خفيف

ونموت خفيف

طب ليه بقى بعد اللى فات

مات اللى مات

فى طابور طويل....علشان رغيف

.....................

كبر

وفكر

فى انتخابات النوادى

وف أمور المنتخب

فى الحب

وف لبس البنات

دافع عن ريادتك للدراما

احنا أجدع منتجين لمسلسلات

عيش زينا

اياك تفكر فى اللى جاى

خليك مافيش

حظك كده

فكر ... تموت

كبر...تعيش

أشرف توفيق

الدستور