Share |

January 10, 2008

زمن ذل المصريين


الى جميع من لايزالوا مخدوعين فى تصريحات الحكومة أو كتابات الصحف القومية أو فى شعارات ساذجة تحركها قلة الخبرة حينا وتحركها رفاهية من لم يعضه الجوع أحيانا..اليهم جميعا...اقرأوا هذا المقال....اقرأوه بقلوبكم وليس بأعينكم....اقرأوه بمخزون ذكرياتكم وليس بتعاليكم عن الواقع....اقرأوه..وأمانة عليكم...كفاية فلسفة فارغة.....ارحمونا

.................................................................

حاجة تقطع القلب، تحزن، من يمدون الأيدي تسولاً هذه الأيام، ممن تحسبهم أغنياء من التعفف، بقايا ملابسهم التي تستر عوراتهم، تدل علي أصول طيبة، ولاد ناس، من عائلات، يخجل الزمان أن جار عليهم، وأذلهم السؤال وأراق منهم ماء الوجوه.
جلوس المقاهي يرون الآن عجباً، متسولين وما هم بمتسولين، محتاجين وكانوا قبلاً من القانعين، ربات بيوت تدل عليهن أياد بضة من إثر النعيم، أفندية يرتدون بدلا - كانت كاملة - وبصديري، استحال لونها، أكل الزمان عليها وشرب، كانت بدلاً، بقايا من زمن غابر.
لا يرتدون هلاهيل البهاليل، ولا مزق المتسولين، يتحدثون بصوت خفيض، يفيض خجلا، تكاد الأرض تنشق وتبلعهم من فرط التأثر، بعضهم يتصبب عرقا وينزف خجلاً، يطلبها بصوت الصمت المسموع ممن ترق قلوبهم وتلين.
بنات ناس، قبل ما تخلو أيامنا من الناس، التي تكفي بنات العائلات ذل الحاجة، والخروج في طلبها من اللي يسوي، واللي مايسواش، ويطمع الذي في قلبه مرض، بنات الناس تبهدلن، يتحاشين النظرات، جاء علينا زمان تخرج الأنثي بحملها، تنوء بحملها، تطلب ثمن الحليب لصغير يتألم من قسوة برد «طوبة« اللي يخلي الشابة كركوبة «ويخشي من زمهرير« أمشير.
فاكرين الست أمينة في الثلاثية، ربات بيوت، أمهات وجدات عفيفات كن منعمات، لم يرين الشارع، لم يمس الرصيف كعبهن، لم يطأن الرصيف قبل هاتيك الأيام التي أذلت أعناق الرجال والنساء، يطلبن الحسنة بلسان الحال، تجوع الحرة.
لم تعد تصدم آذاننا جمل التسول المعتادة:، «حسنة قليلة تمنع بلاوي كتيرة، وهنيالك يا فاعل الخير«، «ربنا يخليلك السُت هانم، والبيه الصُغير«، تسمع عجبا، لو سمحت يا ابني تساعدني لأدفع الايجار، ممكن تتكرم وتعطيني بعضا من المال لشراء علبة لبن للطفل، بعضهن يتمنين موت الطفل فعلاً، ارحموا عزيز قوم ذل، وكم أذلت الحاجة أعناق الرجال.
لولا الحاجة لما تلطمت الفضليات، بعضهن لا يقوي علي المشي قدماً طلبا للحسنة، يجلسن أني يكون لهن، يصمتن عن النداء، يرزقهن الله من كرمه، ماحدش بينام من غير عشاء، والفقير ربه كريم، بيرزق النملة في الحجر، واللي خلقهم لن يضيعهم، يصبرن أنفسهن بآيات من الأمثال والحكم الشعبية وبعض من القرآن.
بعضهم موظف فضل التسول علي الرشوة، بعض الموظفين شرفاء، بعضهم صاروا رهائن عجزهم وهوانهم علي الناس، خرجوا عن مقتضيات الواجب الوظيفي تسولاً، يخفون الوجوه معرة، خجلاً، حتي الحذاء بلمعة الصباح، وياقة القميص بكية الأسبوع، كرافت منحول يغطي معدة خاوية إلا من فطور الصباح، ساندويتش الفول.
لا أعرف لماذا يطلبون قبل الحسنة الماء البارد الذي أمامك، يبلعون مر الكلام، يعوضون نزيف ماء الوجوه، أحياناً الكلام يكون محشوراً في الحلوق، ليس أصعب من بيع ماء الوجوه، يباع علي الأرصفة الآن، ولا حول ولا قوة إلا بالله.
هم من بقايا زمن الخصخصة والحصحصة، الرواد الأوائل للمعاش المبكر، ممن تخارجوا طمعا في بعض المال، راح المال وبقي الموظف علي حاله، وجلسوا علي رصيف الحياة يترجون الله في حق النشوق، وبعد أن قرصهم الجوع، وغلقت الأبواب عادوا بخفي حنين، يمدون الأيدي في امتهان

................................................................................................

13 comments:

DR.HAMAS said...
This comment has been removed by the author.
Unknown said...

الأخ العزيز د.حماس
................
أهلا بيك فى مدونتى البسيطة..شرفتنى
بالنسبة لتعليقك فأنا الحقيقة مش فاهمه..و أستأذنك تعيد قراءة مقال حمدى رزق لأن الراجل مع الناس وضد الحكومة..لكن اللى قادر أفهمه من تعليقك انك متخيل العكس....وبعدين حتى لو كان رأيه عكس رأيك فلا يستحق اختلاف الأراء أن يكون " غير عزيز"..مش كده ولا ايه؟

تحياتى

Anonymous said...

نحن قوم أعزنا الله بالإسلام فلما ابتغينا العزة فى غيره أذلنا الله ..أخى الكريم هقولك حاجة احنا بجد حالتنا زبالة وفيرى زبالة كمان بس كفاية كده علينا يعنى هما قصدهم يحبطونا واحنا كاننا بنقول ايوة نجحتوا وبنقول كمان احنا مكتئبين لاه والله المصريين هيرجعوا تانى خير اجناد الارض وهنلغى كلمة ذل للمستبد ورشوة وخوف وجهل ومرض وسلبية وبنات ليل واعلام هادم ورسائل احباط من قاموس البشرية وربنا يبدل حالنا للحال الذى يرضيه عنا

هذة اول زيارة لى عندك ولا اعتقد انها ستكون الأخيرة واتمنى ان تشرفنى فى مدونتى ومع تحياتى ودمت مع الحق ان شاء الله

مروة الزارع said...

البوست دة قطع قلبى يامحمد أوى

بجد

انت كاتبة بأسلوب رائع فعلا

أنا شوفتهم كتير وكان بيجيلى أحساس غريب مش عارفة هو ملائم للموقف ولا لاءة

بحس انى عاوزة اخدهم فى حضنى بجد

مش عارفة لية الاحساس دة بيجيلى والله

انا معنديش تعليق غير حسبى الله ونعم الوكيل

حسبى الله ونعم الوكيل بجد

Unknown said...

د.حماس

أنا زعلان انك حذفت تعليقك وحرمتنى من شرف تعليقك عندى
أنا طلبت التوضيح وليس الحذف...بس طبعا انت حر وان كان حذف تعليقك بعد ردى عليه يعتبر عيبا فى حقى وتشويها لردى

عموما أهلا بيك فى أى وقت

Unknown said...

العزيزة مروة الزارع :-
مش أنا اللى كاتب يافندم..ده مقال لحمدى رزق فى المصرى اليوم و أنا نقلته للاستفادة وأنا أشرت للمصدر فى نهاية البوست ولو ضعطتى ع اللينك حتقرى المقال فى الجريدة
أنا باحب أسلوب الراجل ده جدا وهو أول حاجة باقراها فى المصرى اليوم وبعديه مجدى مهنا
...................................
مبروك بوستك الجديد بتاع المساواة..أحييكى عليه و رايح عندك حالا......ياللا جهزى القهوة المظبوط

Unknown said...

المدونة الفاضلة "لا للسكوت" :-
أولا أهلا بيكى و أتمنى تكرار الزيارة والتعليق لأنه شرف ليا

ثانيا صدقينى أنا مش ناشر الكلام ده للاحباط أو الاكتئاب ولكنه دعوة للتفكير فى أحوالنا..نوع من أنواع تطهير النفس بالألم....بالظبط زى مانتى اتألمتى لما شفتى المعاقة وفكرتى ف حالك وحالنا....مكاشفة النفس أول خطوة على طريق الاصلاح

تحياتى ليكى

lonely said...

ليسوا هؤلاءئ فقط هم من ال بعم الحال الى هذا الوضع
فالقهر والفقر والاحتياج لم يرحم الكثيرون
ودق ابواب كثيره
واقام بها
هم يسكنون القصور
وغيرهم يفترش الارض ويغطى بالسماء
تحياتى

الـسـيـدة نـون said...

بصراحة
انا مقريتش البوست ده
انا بس جيت اقولك
ان تعليقك على بوست مروة الزارع صاحبة مدونة سلطة
اللى هو عن المساواة بين الراجل والست
عجبنى جدا
سلام
اختك خيخة

Anonymous said...

جزاك الله خيرا أخى الكريم على التوضيح ..وأنا والله قصدت فقط أن أعبر وليس أن أنقد..يعنى حبيت بس ألطف الجو

وعموما شكرا ليك ..فعلا مكاشفة النفس أول خطوة على طريق الإصلاح

وأنا يشرفنى التعليق على موضوعاتك (انت دخلت عندى طب معلقتش ليه..عموما المرة دى سماح )وربنا يوفقك للحق ودمت بكل خير

Empress appy said...

ياااااااا بوستات الجامده
بس انا بصراحه مستنيه اطبعه قريت تخاطيف وهطبعه واقرأة تانى علشان اقول لك رأى

كنت مخبى رايك عنى فيا طيب ممكن تقول للاحسن ولا الاوحش هههههههههه عموما مروة الزراع فتنت عليكوا هههههههههههههههه

MerMaid said...

عزيزي

بجد انا كنت مشغولة جدا في الشاتينج
و اللف علي المدونات
بس والله جيت هنا يةم الخميس و لقيت نفس البوست القديم
مش فاكرة امتي تماما بس لما جيت كنت لسة منزلتش البوست
و بعدين انت عارف انا متاخرش عليك ايدا
--------------------------
كمان كنت مشغولة في بوست جديد
اعتقد اني هيتقبض علية بعدها اكيد
جهز بقي العيش والحلاوة
:)
---------------------------
شوف يا سيدي
انت استهليت كلامك بجملتين روعة

الحقيقة فعلا في ناس كتير بيصدقوا كلام كي كي
عارف كيكي مين؟؟

و بيصدقوا الكلام اللي كيكي بتضحك علينا بيه والارقام الخرافية و ارتفاع دخل الفرد

المهم كيكي دي اصلا متعرفش ربنا
و قليلة الادب
و مستحلية فلوس شوشو
عارف شوشو؟؟
وشوشو ساكتة ولا بتقول حاجة

و بما ان شوشو هتفضل كدة علي طول لانها جبانة
فتوقع المزيد والمزيد من المتسولين

--------------------
:)
لو معرفتش مين كيكي ومين شوشو
متكلمنيش تاني

:)))

Unknown said...

كيكى=حكومة
شوشو= شعب
...................
صح ياهاجر؟