أيوه 2009
مش 2008
أنا واعى كويس للى عايز أقوله
وماهيش غلطة كتابة
هو ليه المفروض نقول ل 2009 أهلا؟
مين قال اننا أهلها ؟ مين قال اننا عايزينها أساسا؟
مش 2009 دى جاية متحملة بميراث 2008؟
طب ايه هو ميراث 2008 بقى؟
أهلنا اللى اتعفنت جثثهم تحت صخور الدويقة؟ ولا أهلنا اللى اترمت جثثهم فى شوارع غزة ومنعنا دخول الاسعاف ليهم؟
أطفالنا اللى بقينا نبعتهم مدارسهم واحنا خايفين مانشوفهمش تانى بضربة شلوت من مدرس يفش فيهم غله..وبقينا خايفينهم ينزلوا الشارع لا يقابلهم كلب بشرى من كلاب الشوارع؟
أشغالنا اللى بقت مهددة بسبب الأزمة الاقتصادية اللى بيتوقع الخبراء أنها ستحدث كارثة فى مصر العام القادم ولا ملاليمنا اللى فى البنك اللى مابقتش تكفى مصاريف مدارس أطفالنا ولا شوارعنا اللى مابقيناش عارفين الموت مستنينا فى أى شارع فيهم
عربياتنا اللى بقت نعوش متحركة على عجلات ولا قطاراتنا اللى بقت اتجاه واحد نحو المقابر....ولا طياراتنا اللى بقينا بنخلص الفرأن قراية ذهابا وعودة على رحلاتها من الرعب؟
مصانعنا ومسارحنا اللى اتحرقت ولا اللى لسه مستنية دورها؟
مستشفياتنا اللى بقى داخلها مفقود وخارجها مولود ولا مستشفيات الأكابر اللى بيخدموهم خدمة فايف ستارز وهما بيموتوا؟
أكلنا وشربنا وهوانا اللى مليانين سل وسرطان وفيروس سى ولا أكل الكلاب والقطط اللى على رفوف السوبر ماركت العلبة منه بمرتب طبيب متخرج من خمس سنين؟
أطباءنا اللى مش عارفين يعالجونا وبيتعلموا فينا ولا أطباءنا اللى هربوا من للخليج وبينضربوا هناك بالكرابيج؟
رجال أعمالنا اللى همهم يسرقوا مدخراتنا من البنوك وملاليمنا من الجيوب عشان يبعتروها على العشيقات صحوبية وجنس وقتل
ولا بنات أعمالنا اللى بتسهر فى شققها مع أصحابهم الأنتيم يشربوا و يسكروا وفى الأخر يتقتلوا ويترمى بلاهم على واحد مننا احنا الغلابة؟
شبابنا اللى مرمى على كل ناصية وكل قهوة واللى بقى بيشرب بانجو أكتر مابيشرب مية.. ولا بناتنا اللى بقت محتارة بين حجاب لضيق ذات اليد أو هاف ستومك تعلق بيه أى حمار بعربية وتاخد منه 50 جنيه فى الساعة؟
بيوتنا اللى بقت من ورق وحديد مضروب وأسمنت مغشوش واللى بقينا كل ما نقرا عن زلزال ولو فى الصين ركبنا تخبط فى بعضها لانموت تحتها .. ولا كومباوندات الأكابر فى أكتوبر والشروق والتجمع والرحاب اللى فيها البيسين وملاعب الجولف الأمريكانى؟
حكامنا الخايفين ولا حكامنا الخاينين ولاحكامناالمتواطئين ولا حكامنا اللى من غير ذمة ولادين؟
نفرح بسنة جديدة اللى فات ده كله جزء من ميراثها اللى بالتأكيد حاتزوده وتكبره؟
يبقى احنا فينا عقل ولا عندنا ضمير؟
زمان كانوا بيقولوا : استمتع بالسىء فالأسوأ قادم
لكن الحفيفة أنا مش قادر..لأن الموجود بقى الأسوأ...والقادم هو الضياع
