Share |

March 25, 2008

للفقيدة الرحمة


طب أنا ممكن أفهم ان لما بلدى تذلنى..وأسافر بره عند أحفاد الحفاة العراة رعاة الشاه...مكن يطلعوا كل عقدهم الدفينة وسفالتهم الأصيلة فيا وفى اللى خلفونى....وممكن يضربونى بالكرباج...ويسحلونى....وفى الأخر ممكن يقتلونى ويرموا لأهلى كام مية ألف من اللى بيرموهم تحت رجلين عاهرات أوروبا وهما بيقلعوا لهم ملط فى السويت بتاعهم
ممكن أفهم ده من منطلق انى فى أرضهم...على ملعبهم يعنى...رايح لهم برجلى....وماقداميش غير حل من اتنين : يا أقبل و أسكت وأعيش عيشة الخدامين اللى أنا رايح أعيشها....يا أرفض و أبقى راجل ولو مرة فى عمرى ومادام هى موتة بموتة يبقى أموت راجل..ع الأقل عشان دود التربة مايقرفش منى.....أبقى راجل وأعمل زى الدكتور المصرى –أخر رمز للكرامة المصرية- اللى لما كلاب أل سعود اللى محتلين أرض الحجاز اعتدوا على شرفه قطع لهم ذكورتهم القذرة و عيشهم بقية عمرهم نسوان...ورجع بلده اتحامى فى راجل مصرى بجد كان وزير خارجيتنا ساعتها اسمه عمرو موسى
ممكن أفهم اننا ننبهر بالحلم الأمريكى المزيف و نجرى ورا البطاقة الخضرا والزرقا و الصفرا عشان نتعلق بديلهم...نولد نسواننا هناك عشان ولادنا ياخدوا جنسيتهم ....ولما نبقى وسطهم ونشوف الذل والهوان والعنصرية لأما نبقى برضه رجالة ونرفض لأما نحط "الشوز" فى بقنا ونسكت...ماحنا فى أرضهم وعلى ملعبهم..وصاحب البيت سيد البيت.
لكن
يدونا بالجزمة ليه على أرضنا؟ يقتلونا زى الكلاب ليه فى بلدنا؟
حاطين الجزمة ف بقنا وساكتين على تمييز الأجانب والعرب علينا بفلوسهم جوه بلدنا
عندنا أربع شهور بلدنا بتتحول فيه خدامة للعرب..أى جربوع بعقال و دشداشة ييجى فاكر كل رجالتنا ديوث وكل نسائنا عاهرات..بسبب أوساخنا من التاكسجية وسماسرة الشقق المشبوهة و أدعياء الفن ..وتحت زعم تنشيط السياحة ومهرجان السياحة والتسوق....أصبح لدينا سياح الكباريهات وسياح الشقق المفروشة وسياح الشذوذ الجنسى من أشباه رجال ونساء
عندنا منطقة كاملة اسمها جاردن سيتى مقفولة و مستعمرة بالقوات الخاصة وفرق المارينز الأمريكى و حرس السفارة البريطانية و الأمريكية
عندنا مناطق بالكامل ممنوع دخول المصريين فيها...منها مناطق عليها لافتة "ممنوع دخول المصريين والكلاب"
كل ده واحنا ساكتين..سكوت العجز والقهر وقلة الحيلة
لكن يضربونا بالرصاص الحى جوه بلدنا..وف قلب القناة...القناة اللى فرحنا لما أممناها ..جاية كلابهم تقول لنا حاتفضلوا طول عمركم عبيد
عامل أرزقى يتقتل بالرصاص الحى وهو أعزل...ينضرب عليه نار من جميع الاتجاهات عشان بينط فى فلوكة يبيع عليها للخواجة أبوعيون ملونة...رايح له فى القارب بيحلم بعشرة دولار يجيب بيهم يادوب كيلو لحمة لعياله....ياخد بدل العشرة دولار عشر رصاصات ترجعه جثة لعياله.....والاتنين التانيين ياعالم حايعيشوا ولا حايحصلوه ولا حايلبسوهم قضية أمن دولة يقضوا بيها بقية عمرهم فى جب الموت أرحم منه


................................................
أأأأأأأأأأأأأأأأأأأأأأأأأأأأأأأأأأأأأأأأأأأه يامصر
.................................................
اقروا الخبر ده
وتقبلوا معى العزاء فى الست سيادة ..وأختها المرحومة كرامة
تحديث
ده كمان الرصاص طلع محرم دوليا...بيعملوا فينا بروفة العراق وفلسطين ولا ايه؟
والراجل بعد ما اتدفن طلعوه وشرحوه ونقلوا التشريح بالأقمار الصناعية الى مستر بوش شخصيا....يافرحتكم يا أهل الميت..دى ما اتعملتش مع صدام حسين شخصيا
بس الحقيقة الخواجة بوش طلع حقانى...لما اتفرج على جتة الراجل المخرمة وهو بيتمشى وبيلعب جولف ماهانش عليه وما خلصوش....على طول بعد ما خلص وخد الشاور بتاعه وقبل ما يشرب الدرينك بتاعه والله....قام اتصل بالريس وقدم له التعازى...وخلاص بقى يابوجمال انتوا حاتحسبوه علينا بنى أدم؟ الفلوس أحسن منه
الا بالحق صحيح..احنا حانحسبه بنى ادم؟ مش كفاية بوش ذات نفسه عزانا و جاب اسمه على لسانه الطاهر؟ عايزين ايه تانى؟ شعب نمرود صحيح
الصوان لسه منصوب

26 comments:

Anonymous said...

لك الحق في ما قلته ويعبر عن رأيك الخاص بك. بس يا ريت ما تعممش لا على العرب ولا على المصريين وارجو ان تخفف من حدة الكلام وارجو انك تبقى في بلدك مصر وان لا تضطر ان تخوض تجربة الغربة
فكما قال الشاعر العربي
بلادي وان جارت على عزيزة
وأهلي وان ضنوا على كرام
ورفقا بالعرب من مصريين وغيرهم وربنا يهدينا جميعا
مع التحية

m5m said...

: الأخ المجهول
لا أتقبل التحية من شخص لا أعرفه
ولا أقبل أن ينصحنى مجهول بانى أعمم أو ما أعممش أو أخف أو ما أخفش من حدة كلامى

اذا كان عندك الجرأة على تحذير الناس فى مدوناتها فليكن عندك الجرأة على كتابة اسمك

بت خيخة وأى كلام said...

قريت البوست بتاعك يا محمد وجسمى قشعر اوى وانا بقراه وقريت كمان الخبر اللى انت عمله لينك
هاقولك على حاجة
انا بعمل حاجة غريبة جدا
عارف لما تكون بتاكل مثلا حاجة طعمها مش جاى على مزاجك
بتعمل ايه؟
بتبلع اللقمة من غير ما تحاول انك تدوقها بتبلعها من غير مضغ
وتشرب بعديها شوية مية
اهه انا لما بسمع اخبار عن ان كرامة المصرى بقت خلاص فى الحضيض بعمل كده فى عقلى
باخد الخبر ومابحاولش افصصه اوى
علشان مهما اندمجت فى الخبر وقوته النفسية مش هاعرف اعمل حاجة
مش سلبية منى بس لانى معرفش اعمل ايه
وعلشان يقين داخلى منى انى مش انا اللى هاعمل وان لو كانت حكومتنا ناس محترمة وعندهم كرامة كان هيبقى فيه قوانين حاسمة علشان حل المسائل اللى من النوع ده
ويكون فيه نوع من الرد القوى على الافعال اللى بتصدر ضدد المواطن المصرى من جنسيات تانية

انا مش عارفة اتكلم يا محمد
لان كلام كتير اوى مش عارفة اطلعه كتابة
الموضوع اكبر من انى اكتب تعليق
انا نفسى مش عارفة اكتب فيه اقول ايه
هل اترحم على الناس اللى ماتوا ولا اترحم على الناس اللى عايشين
ولا ابلع الخبر بشوية مية

عموما البوست قوى جدا
وحاسة بصرخة مكتومة جواك وانت بتكتبه

تحياتى ليك
وعلى فكرة لفت نظرى فى تعليقك عندى لما كتبت عن الطاقية انها سلاح ذرى
كويس انك خدت بالك انها سلاح
مش مجرد طاقية وخلاص

تحياتى ليك يا محمد
وياريت لو ينفع تيجى فى لقاء المدونين
احنا لسة ماتفقناش على ميعاد
بس لو ينفع تعالى ونكمل مناقشة فى الموضوع ده
وياريت تحاول تيجى يوم التبرع بالدم
ولا انت اساسا مش من القاهرة؟
هستنى ردك
سلام
اختك خيخة

Anonymous said...

لا سلام ولا تخية
انا انسان عربي لفت نظري الموضوع اللي حضرتك كتبته فكتبت تعليق اعتقد
بانه لم يتعدى حدود اللياقة او الادب
واترك الحكم للأخوة المعلقين ان كان في كلامي اي اساءه للك والحكم لكم يا سادة
وعلى كل حال اسمي لا يهمك في شئ لانه
انا ما عندي مدونه
ولاشباع فضولك
انا عربي فلسطيني
ولا سلام ولا حتى مع السلامه

ألِف said...

أمين الخولي قال "كريمٌ على نفسي"
يعني كرامة الشخص هي شأن ذاتي ينبع منه و لا يعتمد على غيره لمنحها.

و مش لازم علشان ندافع عن كرامتنا نهين الناس الثانيين.

و فيما يتعلق بالموضوع الذي أزعجك - و معك حق - فإن مسؤولية هؤلاء تقع على عاتق الحكومة، و على أنفسهم أولا.

هؤلاء البمبوطية يقتحمون السفن عنوة و غصبا عن بحارتها، و هذه جريمة، لكي يبيعوهم الأنتيكات التافهة أو السجائر (أو يشتروها منهم) أو يشتروا الخردة (أو يسرقوها).

أنا رأيت بنفسي - و كنت على متن سفينة عابرة القناة - كيف يتسلقون أجناب السفن (الصغيرة و المتوسطة)، و رأيت الاستعدادات التي يتخذها البحارة لحماية سفنهم، من تقفيل المنافذ و ووضع الحراسة.

رأيت تجار الخردة يحاولون جذب أي شيء يمكن فصله و إلقاؤه في قارب الخردة، بغض النظر عن موافقة أو حتى معرفة المسؤولين عن السفينة الضحية.

لا أقول هذا كمبرر للقتل، فلا شيء يبرر ذلك، لكن يجب أن نعرف الحقائق كاملة.

بل إن موظفي القناة البسطاء أنفسهم ممن تفرض بيروقراطية إدارة القناة مرافقتهم السفن المارة (و لا أقصد المرشد، بل "عمال الربط" و عامل "الإضاءة") يفرشون بضاعتهم بعد أن يصعدوا السفينة بشكل مخزي جدا، في حين بفترض أنهم موظفين حكوميين في مهمة.

البحارة الذين عملت معهم على سفينتهم قالوا إنهم لم يروا مثل هذا في أي مكان.

نحن أحيانا نبالغ في "العشم" لدرجة توقع أن يتركنا الآخرون نعتدي عليهم أو نسرقهم.

بالمناسبة، قناة السويس تشتهر بين البحارة باسم "قناة مارلبورو" بسبب أنها العملة الرسمية التي يتهافت عليها صغار الموظفين مقابل إتمام معاملتك و إلا نسوك في المرفأ أو عطلوك بأي وسيلة.

و في ذات الوقت فأنا غير موافق على إجراءات الأمن التعسفية التي تتخذ ضد الصيادين عند مرور سفن عسكرية أمريكية في القناة (أنا غير موافق على مرور سفن عسكرية أساسا، الاتفاقات دي يجب أن تراجع).

رغم أن القناة ملوثة و الصيد فيها و في البحيرات المرّة يجب أن يتوقف.

حاجات كثير غلط فوق بعضها.

بت خيخة وأى كلام said...

محمد
ممكن ايميلك
عايزاك فى كلمة على جنب ومش عايزة حد يسمعنى
ياريت تبعتلى ايميلك على الميل ده
bet_khikha_we_ay_kalam@yahoo.com
هاكون شاكرة جدا يا محمد لو بعتلى ايميلك
سلام
اختك خيخة

بت خيخة وأى كلام said...
This comment has been removed by the author.
m5m said...

: نوران الشاملى

برافو عليكى انك حسيتى بالصرخة المكتومة جوايا و أنا باكتب..حقيقى الخبر ده مجننى ومخرجنى عن أعصابى بشكل لا تتخيليه....احنا خلاص رايحين لفين..الأهالى متجمعين وثايرين هناك بس كالعادة عربيتين أمن مركزى و أمن الدولة تلم كام ست وراجل وانفض المولد
متفهم وجهة نظرك بس خلاص بقى من كتر البلع من غير مضغ روحنا حاتطلع
.
.
.
حاحاول أجى يوم التبرع بالدم أنا من القاهرة وربنا يسهل يوم لقاء المدونين..شرف ليا طبعا الحضور فى الحالتين لو سمحت ظروف شغلى

تحياتى

m5m said...

الأخ العربى الفلسطينى :-

يا أخى لم أقصد اساءة وأنت لم تتعدى حدود الأدب فعلا ولكن لهجتك فى ردك الأول كانت تحذيرية بشكل جعلنى أشك فى مصدرها
وحيث انك عربى فلسطينى فلابد أنك تتفهم كلامى عن الكرامة و سيادة الأرض فأنتم أول المعذبين لذلك

أما حدة كلامى عن العرب فأنا مش باقول كل العرب ولا كل الأجانب ولا كل المصريين ولكن أقصد النماذج السيئة فى كل مجتمع والتى فى طريقها للزيادة وليس النقص

تقبل أنت تحياتى يا أخى الكريم

m5m said...

:- الأستاذ عمرو غربية
شرف كبير ليا يا أستاذ عمرو ان رائد من رواد التدوين زيك ومن أفضل مثقفى مصر يشرفنى بالزيارة

معاك طبعا ان الكرامة لا تمنح ولكنها يجب أن تصان..كما يجب أن تصان سيادتك على أرضك وبيتك

المعلومات اللى تفضلت بذكرها جديدة بالنسبة لى و هى واقع مقزز يضاف الى سفالة سائقى التاكسى والسماسرة وبعض العرب فى فصول الصيف..ولكن هذا لايبرر العنف الذى حدث
من حق البحارة حماية سفنهم واتخاذ أى اجراءات رادعة ولو وصل الأمر لضرب الزورق نفسه بالرصاص..أهو الزورق لو غرق البمبوطى حايعرف يعوم...لكن فتح نار من جميع الجهات وقتل فرد واصابة اتنين؟
صعب قوى يا أستاذ عمرو

على فكرة أنا مافصدتش أهين حد بكلامى وكل من ذكرتهم بالذم ماقصدتش غير السىء منهم وليس عمومهم..ويحزننى جدا من أستاذ عمرو غربية وهو من أكبر أعداء الرجعية وأكثر دعاة الحرية ألا يفهم قصدى
.
.
.
شرفتنى جدا يا أستاذ عمرو وفى انتظارك دايما

m5m said...

:- نوران
تؤمرى طبعا
و أرسلت لكى ايميلى
.
.
.
تحياتى

Anonymous said...

الاخ الكريم
لك السلام والتحية
ملاحظه كلامي كان رجاء وليس تحذيرا
ولك السلامه
ولمصر ولكل العرب
العربي الفلسطيني

عمرو غربية said...

التعليق ليس لي، و لكن لأخي. لكي تكتمل الصورة، فإن حياة من يعتاشون على قناة السويس كبيرة و هم غالبا ما تقطع أرزاقهم أو يتعرضون لإطلاق النار و المحاكمات العسكرية بسبب تحريم السلطات نزولهم مياه القناة.

خايف من الحقيقة said...

اخي الكريم
دي اول زياره لمدونتك..وان كنت ازعم اني عفتك من تعليقاتك في المدونات الاخرى.....
عموما عندي عتاب وتعليق ممكن.....
هفرض انه ممكن...
ياسيدي عنك حق تغضب جدا لكرامتك وكرامتنا كلنا..مفيش خلاف ابدا في دي....بس الغضب ميببرش التعميم في البوست على العرب والي بيشتغلوا عند العرب رغم انك في تعقيباتك على التعليقات نفيت التعميم وده امر جيد منك
ده العتاب اما التعليق يا بطلفهو ان اللي جرحنا مش الامريكان لان الحادثممكن يحصل في اي ميناء في العالم
مهما كانت الاسباب هو مش مبرر ولكن ممكن الحدوث
اللي جرحنا هي حكومتنا اللي مش محافظة على كرامتها ولا كرامتنا
تقبل تحياتي

مروة الزارع said...

برافو عليك يا محمد

بوست هزنى بجد ومش عارفة اقول اية

Nsreen Bsunee said...

لا كرامه للجياع
والجياع ضحايا وليسو متهمين

تحياتي محمد

appy said...

اولا حمد لله على سلامتك وكويس انى اطمنت انك موجود بخير
ثانيا والله يا محمد حسه بوجعتك دى والمشكله ان اغلبنا حاسس بيها
بس والله ما عارفه نعمل ايه طالما حكومتنا مفرطه فينا
عارف موضوع الطفله الصغيرة انا حاولت اتحرك فيه انا ومجموعه مدونين ونعمل طلب ونجمع توقيعات علشان يحققوا ولما سالت قالك لا حياة لمن تنادى دى سياسات دوله ومش هتقدرى تعملى حاجه والله بالحرف ومن مستشار
طيب ايه الحل انا مش عارفه بجد

nonoymm said...

كدة برضه بعد ما ضحكت في البوست اللي فات
عيطت واصلا كنت لسة مخلصة عياط عند فرنسا او اخدت هدنة يعني
هنقول ايه بس
هو دة بقى التمن الغلابة هي اللي بتدفع اما الكبار بقى كفاية اوي يعتذروا ويمكن كمان نعتذر احنا علشان غلطنا في دخول بيتنا
حسبي الله ونعم الوكيل
تحياتي لحضرتك

m5m said...

:أستاذ عمرو غربية

شكرا لك يا أستاذ على الزيارة واللنك المفيد...تحياتى

m5m said...

: خايف من الحقيقة
أهلا بيك...عتابك مقبول وتعليقك سليم وأتفق معك فيه

شرفتنى

m5m said...

: مروة الزارع

شكرا ليكى وتحياتى...أخبار الكاريكاتير ايه؟

m5m said...

: نسرين

لا كرامة لمن لا قرار له عزيزتى

تحياتى

m5m said...

: أبويا العزيزة

ياستى أنا زى القرد..هو صحيح أخر مرة خرفانك نطحتنى بس اتعالجت والحمدلله

أكيد فيه أمل

m5m said...

nonoymm:

تحياتى ليكى..وهى كده الدنيا..شوية عياط وشوية ضحك...بس أنا رأيى المفروض الناس تعيط من البوست اللى فات مش تضحك منه

زورينى دايما

ياسر said...

سيدي الفاضل
شوفة الجزيرة امبارح
الصبح مقال في جريدة
ال اية الامين العام للامم
المتحدة السابق كوفي عنان
بيقول امريكا ضربة العراق بدون
اي وجة حق بدون الرجوع للامم
المتحدة او مجلس الامن امال
كان فين لما ضربوا العراق
واحتلوة وتم اغتيال صدام حسين
كهدية لكل قائد عربي او عيدية
يوم العيد ولاا اخواتنا في غزة
اللاف الشهداء نساء اطفال شيوخ
والاستخفاف بالدم والكرامة العربية
وتقبل مروري ودومت بخير

runescape money said...

cool blog