بالجزمة

لو تصادف أن كان أحد منا فى مجموعة من أبناء "الذوات" ثم قال فى معرض "فشره" عن لبسه اللى من باريس و " جزمته" اللى من انجلترا أو ايطاليا...فسينظر اليه هؤلاء بخالص التأفف والاحتقار...اذ كيف يقول"جزمة" ولا يقول "شوز" مثلا ؟..الظاهر يا جماعة احنا قاعدين مع واحد بيئة طحن

لكن هاهم "الذوات" نفسهم - وليس أبناءهم - قد نطقوها...ووقف طلعت السادات فى البرلمان ليهدد ملك الحديد "ده أنا أضربك بالجزمة"
ياااااى..بيئة بجد

لكن يا جماعة ايه الحكاية؟ وايه اللى وقع الأكابر فى بعض؟ماطول عمرهم شقايق واخوات..والسمن سايح ع العسل؟ قال لك ان الحاج طلعت فجأتن خد باله ان أحمد عز ملياردير..وان عنده 42 سنة بس..وانه بقى هللمة كبيرة قوى فى الحزن الوطنى..فحب يقول له من أين لك هذا..قووووم ايه؟ الواد المعجبانى أحمد -باشا غصبن عن اللى خلفونى-عز افتكره عبد من عبيد شركاته وحب يلبس جلابية الغير خالد الذكر كمال باشاااا الشاذلى فزغر للحاج طلعت زغرة طيرت الحجرين من نافوخه..وطلع له لسانه مع تلقيح كلمتين عن التاريخ المشرف لعصمت السادات ورشاد عثمان..راحت الدنيا والعة

الحاج طلعت لما حس انه اتورط..وان الحكاية حاتوسع..حب ياخدها على سكة النضال..وهاتك ياتهديدات حنجورية وانه ممثل الشعب..ولن يترك حق الشعب..و...و...و..حاجة كده تحسسك ان أحمد عز اللى طايح فى البلد بقاله ييجى خمستاشر سنة...وياما خرب-وبيخرب- بيوت..وياما فلس - وبيفلس- شركات..وياما مص - وبيمص- دم البلد........كأنه طول السنين دى كان لابس طاقية الاخفاء..أو ان الحاج طلعت كان عنده عقد عمل فى الخليج وماكانش ياعينى متابع لكن أول ما رجع مصر قال لايمكن أسيب حقك يا شعب

اتقلبت الدنيا...وعلى رأى عبدالسلام النابلسى " فردة جزمة تعمل أزمة من غير لازمة"...أمسك بعض صحفيو الزمن الردىء بأسياخ حديد العز وراحوا يكتبون بها متباكين على الأخلاق والتقاليد وسمعة مصر....بينما لبس الفريق الأخر جزمة طلعت المستوردة وأخذوا "ينفردون"-كما يكتبون دائما- بفتح ملفات العز وأكل الوز

يعنى لما القضاة اتضربوا بالجزمة فى قلب مصر ماحدش عيط ليه ع الأخلاق وسمعة الست مصر؟ لما اتسحل شباب البلد على الأسفلت وشرب من دمهم وعرقهم عملتوا ايه؟لما بناتكم واخواتكم اتقطعت هدومهم وانتهكوهم التتار...غطيتوهم بايه؟ لما اتحبس شباب من أنضف شبابك يابلد عشان طالبوا بحقك يا خالتى مصر..كنتى فين؟

تحقيق ولجنة قيم وهيئة برلمانية..وف الأخر...بح...ده طلع الراجل عنده السكر والجزمة ضيقة على رجلة فقلعها قبل مايتخانق عشان يدافع عن حق مصر وهو حافى وحاسس بمعاناة الشعب...وطلع المعجبانى عز ورقه كله فى السليم ومتستف وعليه ختم النسر..واللى يتكلم نبرمه ونحطه ف "...."....قام الحاج طلعت لما عرف كده أعلن انه بيحترم العز وأكل الوز وان كله تمام ياباشا..........وطبعا الكبار جابوا الاتنين : "عيب يا طلعت..انتوا اخوات وبتاكلوا فى شعب-طبق- واحد..ماتفضحوش بعض..وانت يا كينج..هدى شوية خوازيقك وماتلمش علينا الصيع كفاية علينا ابن اسماعيل ومراكبه...وتوتة توتة خلصت الحدوتة

الحقيقة أنا زعلان جدا من الموضوع ده..مش زعلان ع الكينج لاسمح الله لأنى عارف الراجل ده خرب كام بيت فى مصر..ولا زعلان ع الحاج اللى كل ماشوفه أحس انه عامل دماغ بيور أصلى...ولا زعلا ن على حق أبلتى مصر - كسر حقها-..لكن أنا زعلان عشان فيه معلومة مهمة جدا ماقدرناش نعرفها ..فاسمحوا لى أسأل الحاج طلعت عليها :- ياحاج طلعت...بيقولوا الجزمة كانت صفرا..طب ورحمة عمك ياشيخ...هى مقاسها كام؟