Share |

July 14, 2006

عن العشق..والهوى...والبطاطس


أحمل بداخلى عشقا خاصا للسينما..وأذوب عشقا فى جو التوحد مع الشاشة لمدة ساعتين فى جو اسثنائى خاص..لذلك فان لى طقوسا أحرص عليهامثل الحرص على مشاهدة الفيلم فى قاعة محترمة (وغالبا أفضل جنينة مول)..وان اضطررت لسينمات وسط البلد فلتكن سينما مقبولة مثل كوزموس..وأفضل حفلات التاسعة أو التالية لها مصطحبا بونبون القهوة باعتبارى مدمن قهوة ولست مدخنا..ووحيدا..حيث أرفض تماما دخول السينما مع صديق أو صديقة..وحين اضطر لاصطحاب العائلة (مراتى وابنى) لأفلام هنيدى وسعد فانى لا أعتبر ذلك خروجا عن طقوسى..فهذه الأفلام ليست سينما ..انها حفلات فيشار وبيبسى و رقائق شيبسى ..ودمتم
الرغى ده كله بمناسبة مشاهدتى اليوم لفيلم "عن العشق والهوى
ترددت كثيرا قبل الذهاب.. فالحقيقة أنى لا أحب أحمد السقا بشكل عام..انه تمثال من الشمع لامع ومصقول دائما مزجج الحاجبين..كثيف الماكياج خاصة عند الشفتين..لامع الوجه دون نقطة عرق واحدة مهما كانت الشخصية التى يمثلها..كائن غير مريح بالنسبة لى عموما اضافة الى ضعف قدراته التمثيلية كما أجمع نقاد السينما ( وأنا لا أعتبر أفلاما مثل تيتو وحرب أطاليا سينما أصلا
ولكنى أحب منى زكى
ويعجبنى أداء منة شلبى
يعنى :- 2/1
لذلك دخلت الفيلم
بشكل عام لم يخيب أحمد السقا ظنى..هو بغباوته وتناحته وفقع مرارة اللى بيشوفه...ولكن منى زكى خيبت ظنى وبشدة..لم أراها فى حالة أسوا من هذا الفيلم..ولكن المشكلة فى رايى ليست فى هذا أو تلك ولكن فى الأفكار والنماذج الشاذة والمريضة التى يحاول دائما تامر حبيب ( المؤلف والسيناريست) تمريرها من خلال أفلامه (راجع سهر الليالى..وحب البنات)..فهو دائما ينتصر لفكرة الخيانة حتى لو لم يكن هناك مايبررهاوحتى مع اخلاص الطرف الأخر..ودائما ينتصر لفكرة العاهرة الجدعة اللى تستاهل كل خير..وهنا فى الفيلم ينتصر للعشيقة بدعوى ان أفضل لذة هى اللذة المسروقة!! ودائما يعيش فى عالم مخملى من أولاد الذوات وطبقة المرفهين الذين لايجلسون الا فى كافتريات الخمس نجوم..حتى عندما قدم حارة قدم شقة فى حارة بها بيانو ومطبخ متكامل بينما أصحابها عاهرة وطالبة... هو شاف حوارى قبل كده؟
لو استطردت فستكون تدوينة طويلة جدا ولكن أنصح من يبحث عن حالة لذيذة (بصرف النظر عن المصداقية) أن يشاهد الفيلم
أجمل مافى الفيلم :- 1-أغنية شيرين 2-التصوير-3- مجدى كامل 4- منة شلبى
أسوأ مافى الفيلم :-1-أحمد السقا 2- أحمد السقا 3- أحمد السقا 4- قصة تامر حبيب 5- منى زكى 6- غادة عبدالرازق 7- بشرى 8-دور خالد صالح
لقطات جميلة :-*منة شلبى وهى تخبر السقا انها حامل وتطالب بحقوقها
طارق لطفى وهو يكاد يضعف مع بشرى حين تشكو من خيانة السقا
لقطة النهاية والسقا متوقف فى الاشارة بجوار اعلان منى زكى وفى الخلفية صوت شيرين
لقطات سيئة :- معظم لقطات السقا وبالذات ردود فعله على لقطة منة شلبى الجميلة ورد فعله وهو يعلم ان أخوه كان يحب زوجته ولقطته مع بشرى وهو يخبرها بزواجه من منة شلبى ( الاتنين كانوا زفت
فى وسط الهيافة اللى مالية السوق حتى تاريخه..ومع احترامى للهالة الدعائية الزائفة حول يعقوبيان..فان هذا هو أفضل المعروض حاليا..فشاهدوه...بس ابعدوا عن السقا..وابعدوا عن بطة بطاطس

8 comments:

Polka Dotted said...

I like how u criticize m3 eny mo7'talefa 3annak fil ra2y f mo3zam eli olto

Unknown said...

بطابيط :-
أسعدنى زيارتك للمدونة وياريت تقولى ايه اللى مختلفة معايا فيه ونتناقش.
شكرا لكى

Anonymous said...

أحمد السقا ده حبيبى وأجمل ممثل فيكى يا مصر

so7ab said...

يا عم احنا اهو متفقين على الاقل فى السينما

انا كمان بعشق السينما ويعنى بحاول اكون مخرج افلام مستقلة

انا متفق معاك فى كل اللى انت قولتو على الفيلم وكمان انا صدعت من العياط الغير مبرر من اول الفيلم لاخره والوصول لحالة النحنحة والشحتفة اللى اساسا بتقفدك بعد شوية اى تعاطف مع الشخصية اللى بتنحنح

بس عندى اختلاف صغير اد كده فى موضوع تامر حبيب مبدئيا سهر اليالى بجد كان فيلم حقيقى وصادق رغم اختلافى معاه كسينما فى حاجات تانية تانى حاجة تامر ابن الطبقة اللى بيتكلم عنها وهو قال انو بجد مش هيئدر يكون حقيقى كده وقريب لو اتكلم عن طبقة تانية خلينا احنا يا عم اللى نكلم عليها بصفتى حلوانى الاصل نسبة الى حلوان الشقيق

بس بجد احييك على رايك فى احمد السقا

Unknown said...

so7ab :-

أهلا بيك مرة تانية واحنا مش مختلفين ولا حاجة احنا بس متحمسين من زوايا مختلفة...بالنسبة للفيلم فأنا ماعرفش المعلومة اللى انت ذكرتها عن تامر حبيب يمكن انت تعرفه شخصيا بصفتك محتك بالوسط لكن أنا مابانكرش انه سيناريست بانورامى هايل وطبعا سهر الليالى كان فيلم جميل لكن انت مش بتلاحظ فكرة الخيانة بتلح عليه دايما؟ وبعدين هل كونه من طبقة معينة يبقى مايعرفش الناس التانية عايشة ازاى؟

Anonymous said...

Wonderful and informative web site. I used information from that site its great. »

Anonymous said...

Keep up the good work »

مروة الزارع said...

عارف انت رأيك زى رأى تمام

عندك حق فى كل كلمة قولتها

أنا لما شوفت الفلم دة زعلت جدا

اكتر حاجة دايقتنى القصة

محستش انة هيبقى فى وفاء فى الدنيا خالص

مرسى بجد لمجهودك