Share |

April 19, 2008

ميزان فيفى عبده



ميزان مايل رقم1

كفة أولى
تجرأ بعض المرضى النفسيين فى الدنمارك و هولندا على رسول الله أفضل خلق الله جميعا وعلى الاسلام...وساندتهم حكوماتهم الغير مسلمة بالطبع... فهاج المسلمون هياج القطيع الفوضوى..بينما تعاملت الحكومة بحذر وخوف وجبن مع الأمر...وانبرت الصحف الملونة مثل الفجر و صوت الأمة والدستور والصحف العميلة للجنة السياسات مثل روز اليوسف فى تدبيج مقالات الدفاع عن حرية الرأى و حق التعبير وأن الرأى يقابل بالرأى والعلم لايكيل بالباذنجان..وأن النظرة النقدية التحليلية للرسومات توضح ان الراجل الدنماركى مايقصدش ياخوانا..ده بس كان شارب كاسين زيادة وخلاص بقى سماح...وسافر الأخ عمرو خالد-الذى أكرهه قبل هذا السفر و بعده- برفقة الشيخ طارق السويدان –الذى كنت أحبه كثيرا- الى هناك عشان يقولوا لهم شوفوا احنا متحضرين ازاى؟ شوفوا احنا بناخد على خدنا اليمين وجايين نديكوا خدنا الشمال وقفانا كمان ازاى؟ تشيك هاندز ياخواجة
كفة ثانية
سافر المواطن المصرى القبطى نظير جيد -رجل الدين المسيحى المعروف فى الكنيسة المصرية باسم بابا الأقباط شنودة الى بريطانيا لافتتاح احدى الكاتدرائيات هناك ...على عينى وراسى.. بالتوفيق....وهو راجع بقى فى المطار اتقدم منه مسئولوا صالة كبار الزوار البريطانيين – المسيحيين- بمنتهى اللباقة طالبين منه التكرم بالمرور عبر البوابة الالكترونية المخصصة للكشف عن الأسلحة والمتفجرات....اجراء أمنى روتينى عادى.... تدخل المرافقون للرجل فى الموضوع على طريقة " انتوا مش عارفين بتكلموا مين؟ ".... ولما كان هذا القانون المصرى "مش عارف بتكلم مين" عملة غير قابلة للتداول فى أى بلد محترمة فقد رضخ الرجل فى النهاية ومر عبر البوابة ثم ركب الطيارة وعاد الى القاهرة. المفاجأة كانت فى رد فعل نفس الصحف المشار اليها فى الكفة الأولى وهو رد فعل متخلف وصل الى أن تصدر صحيفة الفجر التى يرأس تحريرها المناضل عادل حمودة و يؤجرها من الباطن للهجوم على المقدسات الدينية كاتب يدعى محمد الباز..خرجت تلك الصحيفة بمانشيت رئيسى يقول " دافعوا عن كرامة مصر بعد تفتيش البابا شنودة فى مطار لندن"...يانهار أسود..كرامة مصر؟ ايه علاقة كرامة مصر باجراء أمنى عادى يحدث فى كل مطارات العالم...وكانت فين كرامة مصر واحنا بنتضرب بالجزم فى دول الخليج وبنتقتل فى الموانى المصرية بايد الأمريكان و أطفالنا بتموت عالحدود بايد اليهود؟
الراجل عدى من بوابة..ولا فتشوه ذاتى ولا فتحوا شنطه ولا أى حاجة تمس كرامته ولا كرامة مصر...وعلى فكرة لغاية دلوقتى ماشتكاش ولا فتح بقه لا هو ولا أى مواطن مصرى قبطى فاهم ان دى هى الاجراءات الأمنية اللى بتحصل فى كل حتة فى العالم بعد 11 سبتمبر من أول سيتى ستار لغاية ألاسكا..وهى نفس الاجراءات اللى بتخليهم يفتشوا فى شعر دقن المسلم المصرى الملتحى وبتخلليهم يقلعوا المصرية المسلمة المحجبة طرحتها....اشمعنى دول مش كرامة مصر؟
المصيبة بقى لما حكومتنا الموقرة حبت تهيص وتزيط فى الزيطة..قام الأخ أبو الغيط –بتاع كسر رجل الفلسطينيين- رازع تصريح لولبى ان مصر حاتعامل أعضاء الحكومة البريطانية بالمثل لما ييجوا مصر...ده وزير خارجية بلدنا اللى بيقول كده....قام الانجليز من شدة احترامهم لمصر ودورها الريادى فى المنطكة خللوا موظف فى الخارجية البريطانية يرد ويقول ان بريطانيا ترحب بتطبيق القواعد الأمنية على جميع مسئوليها فى جميع أنحاء العالم لأن بريطانيا تدرك جيدا التحديات الأمنية على مستوى العالم..يعنى بالبلدى جينا نغيظهم ونهددهم بأسلوبنا البيئة قاموا ردوا علينا وقالوا لنا روحوا العبوا بعيد..... هو انتوا عشان بلد كوسة فاكرينا زيكم؟ ..........جتها نيلة اللى عايزة خلف



ميزان مايل رقم 2
كفة أولى
هانى سرور و أخته نيفيان وجميع شلة هايديلينا...............براءة
كفة ثانية
خيرت الشاطر وحسن مالك و أخرون...................... أشغال شاقة من 7 : 10 سنين و مصادرة أموالهم

والكفتين كانوا فى يوم واحد

ليه بقى؟
اتضح ان هايديلينا بتدعم الصناعة المحلية اللى مكسرة أسواق العالم و مخلية الأمريكان مرعوبين مننا...وبتدعم الفن المصرى حيث أن كريم عبدالعزيز بتاع خارج عن القانون متزوج من هايدى هانى سرور..وممكن هايديلينا تنتج له أفلام.....وكمان بتدعم خطة الدولة لتقليل الزيادة السكانية ...حيث أن أى مضاعفات تحدث - نتيجة جهل المريض طبعا- بتخصمه من تعداد المواطنين فورا......وبالتالى لازم ياخدوا براءة
أمال ايه كل اللى كان موجود فى قرار الاتهام ده؟
ظلم وافترا بعيد عنك....يعنى ايه قربة الدم غير مطابقة للمواصفات؟ هى مصر ماشية ع المواصفات فى ايه يعنى عشان تيجى على دى؟..... يعنى ايه الابرة تخينة شوية؟ ماهى خدمة لاخواننا المصريين الحلاليف أصحاب الجلد التخين...... أمال حالات الاغماء دى كانت من ايه؟ سوء تغذية ياباشا..دول ناس بيفطروا فول وحاجات مقرفة كده..مش بيفطروا زبدة و لاتيه وكورن فليكس بالعسل ليه؟.....ياعم دول بيقولوا ان كان فيه ميكروبات وبكتريا جوه القربة.....طب وهى يعنى الميكروبات جديدة علينا؟ ماكل حاجة فيها ميكروبات...ده حتى الميه المعدنية اللى بنغطس فيها فى الجاكوزى طلعت فيها ميكروبات..........براءة ياباشا ان شاء الله


أحلى حاجة عجبتنى فى الموضوع ده تقرير مصور عمله عمرو أديب يوم الحكم و جابوا واحد من هتيفة هانى سرور اتضح انه "نائب مدير مكتبه".. هو قال كده...المهم الراجل ده علق ع الحكم وهو بيجعر وقال ايه : " يحيا العدل...متشكرين للقاضى...متشكرين للريس حسنى مبارك...ماهو الريس أكيد كان ليه رأى فى القصة"....والله العظيم قالها كده


أما بقى خيرت الشاطر و حسن مالك بتوع شركات سلسبيل و كمبيوتر صخر و محلات موبيليا استقبال و غيرها فكان لازم ياخدوا الحكم ده...وأكتر منه كمان...دول حتى كانوا حنينين معاهم
يعنى ايه يبقوا متدينين؟ يعنى ايه يبقوا ملتزمين؟ يعنى ايه يقولوا ربنا الله؟ يعنى ايه يبقوا مليونيرات بالحلال و ياكلوا لوحدهم ومايدفعوش غير الزكاة والضرايب؟ هى سايبة ؟ هى تكية؟ ممكن بالفلوس دى يدعموا الاسلام..واحنا ياشطار دولة مواطنة ولسنا دولة عقيدة..... طب اشمعنى ساويرس؟ اخرس يابنى ماتوديناش فى داهية...ده تبع أمريكا...ده بيدعم الفن والمزيكا....ده بيكره الحجاب والمحجبات...هو فيه زى ساويرس؟


من كام شهر جت شرطة المسطحات فى المنيل تهد نادى نيلى لأعضاء هيئات التدريس...و جنب منه المسرح العائم بيعرض مسرحية لفيفى عبده ماجوش ناحيته...لما أساتذة الجامعة اعترضوا قالولهم بالنص : "لما تبقوا فيفى عبده نبقى نسيب النادى ومانهدوش"...عندهم حق الصراحة


ولذلك ..من واجبى أنصح خيرت الشاطر ورفاقه نصيحة مخلصة : وانتم فى السجن..اتعلموا تبقوا فيفى عبده.

35 comments:

عصفور المدينة said...

وما أكثر الموازين المائلة

بطوط حبوب said...

هو الاخ مش مصرى برضه؟؟!!
طب مستغرب ليه؟؟!!

وموضوع عمرو خالد
فى فرق كبير بين ان تكون عالم وانك تكون ........
عشان كده متستغربش لما ....... يغلط

mostafa rayan said...

انا عايزاقولك حاجة بس لوسمحت ماتزعلش مني
انا قرأتلك عند اعترافات انثى جامحة بصراحة اتغظت قوي من تعليقك بس لما جيت هنا لاقيتك بتقول كلام موزون ومعقول قوي
انت حيرتني معاك
علي فكرة ممكن تحذف التعليق لومش عاجبك وانا مش هزعل

Unknown said...

: عصفور المدينة

عندك حق يا أستاذى

Unknown said...

:بطوط

أهلا بيك يا جميل..متابعك عند خيخة بتحجز لك هناك بالاربع تعليقات مرة واحدة

طبعا مصرى وابن مصرى وابن مصر الله عليه..على رأى الست نانسى عجرم

أهلا بيك

Unknown said...

mostafarayan :

لكل مقام مقال يا صديقى....تعليقى اللى غاظك هناك ده يتفق مع مكانه..ماهو مش معقول أقرا قرأن فى بيت دعارة لا مؤاخذة.....وبعدين ايه اللى يغيظ فيه؟ دول تعليقين..واحد من سطر واحد والتانى كلمة واحدة....لو تابعتنى حاتلاقينى بادى لكل مكان حقه..المدونة المحترمة بتاخد تعليق يناسبها والعكس

أما هنا فهى مساحتى الخاصة..أعك فيها زى أى بنى أدم طبيعى لا يدعى الحكمة والاتزان

.......

شرفتنى وياريت تبقى صديق دائم للمدونة

Empress appy said...
This comment has been removed by the author.
الـسـيـدة نـون said...

ههههههههههههههههههه
بجد والنبى يا محمد الراجل قال كدة
قال ماهو الريس ليه راى فى القصة
هههههههههههههههههههههههه
اه يابلد

عارف الموقف ده فكرنى بايام الاضراب اللى فات ده علطول
كانت قناة البى بى سى العربية جايبة استطلاع عن راى الشارع المصرى
راجل طلع فى التلفزيون بيقول
الحكومة دى قادرة
انتوا مش شايفين عملت ايه فى الجو علشان الاضراب يبوظ
انا سمعت كدة وفطست على روحى من الضحك
مش علشان الجملة اللى الراجل قالها
انا ضحكت
لان الراجل كان بيقولها بجد ومصدقها فعلا

المهم يا محمد
البوست بتاعك النهاردة متنوع
وفيه كم من الاخبار تحرق الدم
هاقول ايه غير منهم لله

تحياتى ليك
اختك خيخة

bastokka طهقانة said...

ايوة فعلا و فيها اية لما يتفتش زي اي حد

حاجة تنفخ


اوروفوار

الـسـيـدة نـون said...

حذف أو اخفاء البوستات أنا شايف ان فيه عدم احترام لكل شخص اداكى من وقته ع الأقل خمس دقايق يكتب لك تعليق..ومن حق اللى عمل كده تحترمى رده عندك وماتلعبيش كل شوية بالبوستات بالشكل ده


تعليقك كان قاسى جدا يا محمد
بقى معقول انا وحشة للدرجادى ومش واخدة بالى
انا لاقصد ابدا عدم احترام اى شخص شرفنى فى مدونتى
لكن هى والله حالة زهق وماكنتش عارفة اطلعها على مين و مالقيتش غير مدونتى
قلت اعك فيها زى ما انا عايزة

بس عموما برضه الحق يقال
تعليقك ده كان السبب انى جريت بسرعة على الدرافت بتاعى ونزلت كل البوستات تانى
انا مش اد زعلك يا عم محمد

منورنى دايما
اختك خيخة

Desert cat said...

للاسف كل لما نقول الفجر هيبان يطلع لنا ميزان مايل اكتر
تحياتى

Empress appy said...

عارف انى هضربك بفرشه اسنان قريب
يا ابنى سلامة عبده جزر
كتباك مايهمش وهو مهم
يعنى انا غلطانه ماشى عيال متجيش غير بالضرب ليه عندك اعتذار وواحد ليمون

Unknown said...

:أبويا العزيز

شلوت ايه؟ عيب عليكى..مرحلة الشلاليت عدت من زمان...دلوقتى بناخد بالقفا وبالخازوووووق

Unknown said...

:نوران خيخة
أه والله العظيم قال كده..ده أنا مسجلها

أما بخصوص الجو فطبعا سمعت الكلام ده و الأدهى منه مدونين ومدونات محترمات كتبوا ان الجو ده مشاركة من ربنا-استغفر الله العظيم-فى الاضراب

حاجة تفلق

Unknown said...

:طهقانة

لذيذة قوى أوروفوار دى..أنا متابعك من زمان على فكرة وباحب كتاباتك جدا

سلامى للأستاذ طهقان

Unknown said...

: نوران خيخة مرة تانية

تعليقى كان قاسى لأنك عزيزة عليا ولأانى باحب مدونتك جدا و مايرضنيش أشوف أختى بتعمل كده....خدى بالك قصة ان دى مدونتى أعك فيها زى ما أنا عايزة دى نغمة منتشرة وهى كلمة حق يراد بها باطل.. نعك فى الكتابة وفى اختيار المواضيع..ماحدش من حقه يقول لنا ليه بتكتبوا فى ده وما بتكتبوش فى ده...وفى أسلوبنا طالما فى حدود الأدب
لكن لازم نحترم معلقينا زى ماحترمونا
.
.
.
تحياتى لهانى و شريف

Unknown said...

:قطة الصحرا

أهلا أهلا..كنت متوقع منك تعليق أطول باعتبارك من أعدى أعداء الجماعات الاسلامية..وعلى فكرة أنا مش منهم وهى ليست تهمة أنكرها وليست شرفا لأدعيه...ولكنى تناولت الموضوع بمنظور انسانى مصرى

تحياتى

Unknown said...

:أبويا العزيز
كيلو الليمون بستة جنيه..بطلت أجيبه
تشربى عرقسوس؟

ومين عبده جزر؟بتاع نضارات النظر

مصطلحات كوكبية خرفانية صحيح

Tamer Nabil Moussa said...

بوست اكثر من رائع

واحيك علية


كل حاجة اليويمن دول مايلة

وعايزة تتعدل


تحياتى

Hypatia said...

عزيزي محمد

لازم اعترف الاول قبل اى حاجه ان البوست عشره على عشره بجد هايل

فطستنى ضحك على رد بريطانيا على ابوالغيط

هههههههههههههههههه
" روحوا العبوا بعيد..... هو انتوا عشان بلد كوسة فاكرينا زيكم؟ ..........جتها نيلة اللى عايزة خلف"


رغم اختلافي مع الاخوان لكن انا ضد محاكمه المدنيين عسكريا تماما لكن اعترف بانى باتمنى زوال الاخوان من مصر خالص خالص لذلك مش باتعاطف كتير مع اللى بيحصل معاهم
:)

هايدلينا بقي ديه قصه تانيه والله تصدق وتؤمن بايه"لا اله الا الله"انا كرهت كريم عبدالعزيز من ساعه ما شفته عمال يحضن هانى سرور وعرفت بعد كده انه حماه
البلد بقي كلها حراميه على كبير اوى ومسنودين اوى عشان كده مبقاش فيع امل غير فى اطاحه النظام كله

_______


موضوع الرسومات المسيئه للرسول انا شايفه انه ميستاهلش مننا كل ده والله ولا عمرو خالد ولا سويدان ولا عشره شبههم ولا كل المسلمين حيدافعو ويحمو سيدنا محمد عليه الصلاه والسلام
الاسلام ونبي الاسلام اقوي بكتير اوى من كل العبط والهبل ده رومان وفرس وقبائل جزيره العرب الوثنيين خضعو لحكمه محمد -ص-على مر العصور والتاريخ الاسلام اكيد اتعرض لانتقادات واساءات اكتر من كده بكتير فى السر وفى العلانيه
فيه حاجه اثرت فيه
فيه حاجه اثرت في نبيه
يبقي اكيد يعني مش شويه رسوم هبله هى اللى حتهد الدنيا
ومش معقوله بجد ردود افعال المسلمين ناحيه الموضوع ده ده هاين عليهم يولعو فى هولندا
فين التسامح اللى الاسلام بيقول عليه بقي
مش معقوله حنعمل زى العيال ونتكلم فى بديهيات ونحكي قصه اليهودي اللى كان جار الرسول وكان بيسئ ليه ولا الرسول دبحه ولا علقه فى المشنقه-عليه افضل الصلاه والسلام-بس احنا سبحان الله مصريين نشوه الاسلام ونطلع بصوره الهمج الفوضويين الدمويين العدوانيين

___________

انا باحترم ساويرس فى حاجات كتير وباتخنق اوى اوى من اللى بيجيبو سيرته على الفاضيه والمليانه ويقولو عدو الاسلام وعدو الحجاب وبتاع
الراجل حر فى رأيه ولا اهان الاسلام ولا اهان المسلمين وراجل شيك وذوق وجنتل لو عاوزين نحاكمه يبقي نحاكمه كرجل اقتصاد ومال واعمال زى احمد عز وغيرهم من اللى واكلين البلد والعه لكن النظره ليه من البعض على انه مسيحي وعدو الاسلام وبتاع ديه مش بتعجبني خالص يا محمد


المهم بقي انت ازيك وايه اخبارك

Unknown said...

:تامر نبيل

أشكرك على التحية...وحاجى قريب أرد لك الزيارة

تحياتى ليك

Unknown said...

nsreen bsunee :
أولا أشكرك على رأيك...وأنا بجد والله مش يهمنى قوى حلاوة الكتابة قد مايهمنى ان رأيى يتفهم صح
.........................
بالنسبة للخارجية البريطانية...تعرفى ان وزير خارجيتنا الشملول بعد الحدوتة دى كان مسافر بلد والمفروض يقف ترانزيت فى لندن...خاف ليتفتش راح غير خط سيره وعمل الترانزيت فى باريس
بلد اكسلانسات صحيح
..........................
الموضوع مش موضوع اخوان ولا حب وكره...الموضوع كفتين ميزان...انت بتحبس دول وتدى ده براءة ازاى؟ بتصادر فلوسهم و بتزود لده فلوسه ليه؟ دول ماعملوش حاجة وحشة للناس..فكرهم الدينى أو السياسى مش عاجبك ايه المشكلة..مافرضوهوش عليك..خايف فلوسهم تدعم توجهاتهم؟ طب والفلوس اللى من دم الغلابة دى ماصادرتهاش ليه؟ بتبصم لسرور على الترانسفير لبنوك سويسرا بأمارة ايه؟
طب لو الموضوع ان فلوسهم بتدعم توجههم الدينى طيب ليه ماصادرتش فلوس ساويرس وثروت باسيلى وهانى عزيز و منير غبور وكل دول بيدعموا الكنيسة المصرية علنا (لا أدعو لمصادرة أموالهم..ولهم كل الحرية فى أموالهم..أنا فقط أقارن المواقف)...سبع سنين وعشر سنين أشغال شاقة بمناسبة ايه؟ حد يطلع دليل على تهمة تستاهل أسبوع حبس و أنا أبقى غلطان...انتى عارفة حاكموهم عسكريا ليه؟ عشان متأكدين ان أصغر محمة مدنية حاتطلعهم براءة من تانى جلسة...صحيح فيه استئناف ونقض..بس المحكمة العسكرية مافيهاش غير تصديق الحاكم العسكرى

موضوع هانى سرور ده موضوع مقرف جدا وريحته طالعة بشكل يصحى اللى ماتوا من 5000 سنة...فمش حاتكلم فيه تانى
..........................
متفق معاكى فى كلامك عن الرسوم المسيئة والمواقف التى اتخذت...بس أنا كنت عايز أقارن بين الموقف المتخاذل الذى اتخذ عندما فكر أحد الكلاب فعليا فى اهانة الرسول خير خلق الله جميعا...وبين العنترية الفارغة عندما اتبع البريطانيون اجراءات عادية بغير قصد الاهانة مع بنى أدم عادى زيى و زيك..لايرقى مع خالص احترامى لجزء على مائة من قيمة الرسول محمد ولا مكانته
فهمتى قصدى؟

..............................
موضوع ساويرس ده أنا مخضوض منك بجد
أكيد انتى بتهرجى
ماهو مش ممكن يكون رأيك مبنى على انه راجل "شيك" و "ذوق" و "جنتل"...يالها من مميزات؟
هو أنتى بتدورى على عريس؟
أولا أنا ما اتكلمتش عنه من زاوية انه مسيحى الا لابراز التضاد فى عدم مصادرة أمواله زى ما قلت فى أول ردى....وماقلتش انه عدو الاسلام لأنى لا أملك دليلا أقول به ذلك...لكن كرهه للحجاب هو اللى أعلنه وهو رأى بصرف النظر عن الزاوية الدينية فهو تصريح يفتقر للذوق واللياقة...أنا مثلا لو مش باحب منظر القس بملابسه السوداء اذا مشى فى الشارع...أنا حر...لكن لو أنا فى شهرة ساويرس لازم يكون عندى ذوق ولياقة وماقولش كده...الا اذا قلته معتمدا على الاستقواء بأمريكا والغرب مثلما يفعل هو..وهو حوارى مع رامز الشرقاوى عنده

أما لو قيمناه كرجل أعمال فيبقى جنيتى عليه...وأبصم لك بالعشرة ان أحمد عز حايطلع جنبه ملاك من السما....يكفى فضيحته الأخيرة فى ايطاليا وقضية رشوة ال 97 مليون دولار
بصى...أنا كمهندس اشتغلت فى احدى شركاته سنتين..وليس من رأى كمن سمع
و أظنك فاهمة قصدى

.....................
تحياتى لمعاليكى

شيك وذوق وجنتل....ليه حق واالله يعمل فينا أكتر من كده

سبهللة said...

كلامك شدنى من اول حرف لاخر حرف
تحياتى بالتوفيق ان شاء الله

Hypatia said...

ميصحش يا محمد تقوللى انتى بتدوري على عريس ولا ايه

ديه اولا

ثانيا انا باتكلم باستهزاء ساويرس من الناحيه اللى بيتكلمو بيه عليها فى معظم الوقت حاجه فى منتهى التفاهه مجرد النظره ليه على انه مجرد مسيحي ووجه بيظهر فى الاعلام يقول انا مش بحب الحجاب ديه حاجه سطحيه جدا لو حنبصله من الناحيه ديه يبقي فعلا الحقيقه انه كراجل فى ظهوره الاعلامي بيظهر شيك وذوق وجنتل ومثقف وصوته رايق وموزون

لو عاوزين نتكلم جد وصح على الراجل يبقي لازم يتحاسب من زاويه تانيه خالص اللى هى زاويه المال والاعمال

وده اللى انا قلته
كوجه اعلامي هو مجرد راجل شيك وذوق وجنتل ومتحدث لبق قال ريان يا فجل قال مش بحب الحجاب قال تحيا مصر مش فارقه لانه فى جميع الاحوال النظره ديه سطحيه لمجرد صوره او وجه بيظهر فى الاعلام وبيقول تصريحات بتعبر عن رأيه الشخصي اللى من حقه تماما زيه زى فاروق حسني كوجه اعلامي وتصريحاته ديه حريه الشخصيه بس تعالى بقي احاسبك كوزير للثقافه يبقي هو ده الكلام الجد مش اسيب كل بلاويه كوزير ثقافه وامسك فى تصريح قاله عن الحجاب

ولان انا متاكده انه ساويرس كراجل اعمال وراه بلاوي بجد وفضايح بجد ليه ولغيره وكشف للمستور زى ما بيقولو يبقي ديه الزاويه اللى لازم نبصله منها

مش نسيب الاساس ونمسك فى تصريح ولا في القناه اللى هو عاملها ديه اسمها تفاهه ولغايه دلوقتى بصراحه مقرتش لاى حد من اللى بيهاجمو ساويرس وعاملين بانرات لا لساويرس بيتكلمو عنه من زاويه المال والاعمال كله فقع مراره وحاجات تافهه لامؤاخذه يعني ساويرس لو مسلم كان حيفضل حرامي برضه وثرواته مشبوهه لو مسلم كان برضه من حقه يقول مش بحب الحجاب زى فاروق حسني وحسين فهمى وناس كتير

كل اللى باقوله وعماله اعيده وازيده ام الاستاذ ساويرس وراه بلاوي كتييييييييييييييييييييييييير مش منها ابدا عدم حبه للحجاب او القناه بتاعته بالعكس القناه هى الحاجه الوحيده الكويسه اللى عملها


ملحوظه اخيره:انا مكنتش اقصدك انت اصلا لما قلت انى باتخنق من اللى بيجيبو سيره ساويرس على الفاضيه والمليانه وبيقولو عدو الاسلام وبيحارب الاسلام وكلام كده انا عارفه انك مقلتش كده بس انا باتكلم فى عموم اللى باشوفه على الانترنت او غيره

Unknown said...

:سبهللة ع الأخر

شكرا..وأنا برضه عجبتنى مدونتك جدا...وحاسس ان أسلوبك ده مش غريب عليا

تحياتى

Unknown said...

:نسرين بسيونى

أظن مش لازم يعنى أكتب لك "هههههههههههههههه" بعد الكلمة عشان تعرفى انى باهرج...أى حد يقرا حايفهم انى باهرج

ثانيا : مش فاهم ليه احنا حانحول التدوينة على ساويرس؟
أنا أردت اظهار التضاد والتناقض الموجود فقط..فياريت نبص للموضوع من الزاوية دى
موضوع الفساد والاستقواء بالغرب والممارسات الخاطئة بتاعته ممكن أكتب فيها لغاية أسبوع كمان..بس ده مش موضوعى خالص

ومادمتى مصممة انه شيك وذوق وجنتل يبقى خلاص زى ماتحبى

بس رأيه فى الحجاب مش حرية شخصية ولازلت مصرا على أنه رأى قليل الذوق وقليل الأدب كمان

أما القياس على فاروق حسنى فهو غير جائز...لأن الشىء يقاس على مثيله...ونجيب ساويرس فى حدود علمى ورغم كل مساوئه ...مازال رجلا

الـسـيـدة نـون said...

انا جاية علشان ادحرج التماسى

سلام
اختك خيخة

بنت القمر said...
This comment has been removed by a blog administrator.
بنت القمر said...

بخصوص الموازين المايله
في مدونه بحبها اوي اسمها العداله للجميع ورغم ان محتواها هايل
لكن اضيف عليه
روعه وقيمه عنوانها
ممكن تبقا تتابعها لو حبيت
تحياتي

Unknown said...

:بنت القمر

بخصوص تعليقك الأول أنا باعتذر انى اضطريت أحذفه لأنه كان مستفز زيادة عن اللزوم وما اعتقدش انك بتزورينى عشان تستفزينى طبعا..أكيد مش قصدك بس هو حماس زيادة منك...كان ممكن أخليه بس كنت حابقى مضطر أرد عليه وردى كان ممكن يبقى على نفس درجة الاستفزاز وندخل فى مهاترات مالهاش داعى...فحفاظا على روح الود بين المدونين اضطررت أسفا لحذفه
..................................
طبعا يشرفنى متابعة مدونتك وأنا علقت على بوست اسراء بس البوست اللى بعده والبوست اللى نزلتيه جديد النهارده محتاجين تركيز شديد..حاقراهم بتركيز و أعلق عليهم أكيد
.................................
أنا قريت فى البروفايل انك طالبة..دراستك ايه يابنت القمر؟
على فكرة انتى ممكن تقوليلى محمد..ده اسمى...ممكن أندهلك بايه بدل بنت القمر؟
.................................
مدونة شريف عبد العزيز "العدالة للجميع " موجودة فى قائمة مدوناتى المفضلة ( على اليمين) منذ سنتين ..وطبعا باتابعه وهو انسان رائع
.................................
ممكن تشرفينى بتعليق أعمق على محتوى البوست لو عندك وقت؟
أنا باحترم عقليتك بصرف النظر عن أى خلاف فى وجهات النظر

بنت القمر said...

حذفت التعليق
ا!!!!!!!!!!! وجيت تقولي انك حذفت التعليق
اللي كان اوله كل سنه وانت طيب ونهايته كمان !!وشرح للموقف السابق
تقريبا يا استاذ محمد انت مستفز مني اصلا
وانا مذهوله بجد وحزينه
اناعمر ما حد حذف لي تعليق
كنت مردتش احسن واو شتمت ارحم
ربنا يسامحك
وبعدين بتسأل انا طالبه ايه؟؟
انا طالبه علم.. في اي مكان واتجاه وخريجه من حوالي 12 سنه
و الدنيا لسه بتعلمني
تحياتي

Unknown said...

بنت القمر
...........

عشان ماتفهميش غلط وعشان ماتبقيش زعلانة أنا حانشر ردك المحذوف هنا وبدون ما أرد ولا أشتم زى مابتقولى عشان عيب أعمل كده وده مش أسلوبى
...............................
...............................
كل سنه وحضرتك طيب
لو مكنتش جيت تعيد كنت انا جايه اكيد
:)))
تانيا بخصوص النقاش السابق نو بروبليم نهائيا كل اللي حضرتك عملته انك وقفت في وش القطر وهو ماشي
وانا كنت مستفزة وجت فيك
معلش
الفئه المندسه تلاحقني من فترة
:))
بامكانك متابعه الثلات بوستات الاخيره عندي!!ا
واي مكان اتواجد فيه
:))
وعلي الرغم اني طول عمري مش غلاطه والحمدلله لم ازل
يلاحصل خير
وكل سنه وانت طيب
وبالصحه والسلامه
نقطه ومن اول السطر
وصفحه جديده

...............................
...............................

أنا بقى وقفت فى سكة القطر اللى هو انتى؟ وطبعا القطر فرمنى..صح؟

وانتى طول عمرك مش غلاطة..طب مين؟

وايه بقى يمكنك تابعتى فى أى مكان أتواجد فيه دى؟ بصفتى أحد المعجبين مثلا؟

بذمتك بقى مش ده استفزاز؟

ع العموم أنا لما جيت أحذف التعليق ماحذفتوش نهائى..بس دلوقتى مش عارف أسترده ازاى...لو تعرفى قوليلى..أنا جبت كلامك من الايميل

.................

نقطة ومن أول السطر وصفحة جديدة زى كلامك....على فكرة ماتزعليش من كلمة طالبة..انتى اللى كاتبة كده فى البروفايل بتاعك

mohand said...

ارجو المرور علي اخر موضوعاتي في مدونة الباحث عن الحقيقة يهمني رايك
تحياتي

mostafa rayan said...

انت فين
مستنين الجديد يا نجم

Anonymous said...

cool blog