Share |

May 17, 2008

زبون


غاز
فى يوم 1 مايو 2008 اختارت حكومتنا-أو بالأدق نظامنا الحاكم- بدء ضخ الغاز الطبيعى المسال الى الكيان الصهيونى المسمى اسرائيل....عيد العمال أصبح عيدا للاستندال ...غزة تغرق فى الظلام ونحن نصدر الغاز لاسرائيل لكى تظل شوارعها مضاءة و مرافقها العسكرية – وكل مرافقها عسكرية – تعمل بكامل طاقتها فى سحق الفلسطينيين.....دى لوحدها مصيبة
المصيبة التانية ان احنا بايعين لهم الغاز بعقد احتكار عشرين سنة بسعر مدعم..حوالى 15 % من السعر العالمى..أصلنا بندلل على الغاز بتاعنا ومش لاقيين نوديه فين ( خبر : غازنا حاينتهى بعد 12 سنة)..نقوم نهادى بيه الأحبة... نهادى بيه حسين باشا سالم ملك شرم الشيخ و موفنبيك والجولف واللى منه...يقوم حسين باشا مهادى بيه اسرائيل عن طريق شركة من شركاته ( باعها مؤخرا للأمريكان بعد أن أدت دورها)....الجميل بقى ان لما الصحافة الوحشة المغرضة عملت شوية مانشتات سخنة عن الموضوع لزوم البيع والتوزيع راح رئيس العصابة طالع لنا بتصريح ان الحكومة بتحاول مع اسرائيل رفع السعر قليلا....يعنى والنبى ياختى ربنا ما يرميكى ف ضيقة ادينى كام سنت زيادة أشترى بيهم أندروير أتغطى بيه أحسن فضيحتى بقت بجلاجل
ياسلام؟
يعنى دى محاولة من الحكومة لترسيخ مبدأ البيع وتمريره فى العقل الجمعى للمصريين..الحكومة عايزة تقول للمصريين : انتوا مش "رغيتوا" فى سعر البيع..أدينا زودناه...عايزين ايه تانى ياظلمة؟ وهو فى الواقع منطق حكيم..يذكرنى بمنطق العاهرة التى ظبطها أبوها عريانة ع السرير مع واحد ولما طلع مسدسه عشان يموتها وقفت حاطة ايدها فى وسطها وقالت له ببجاحة : "مش تعرف الأول الزبون حايدفع كام؟
..........................................
قضاء
هانى سرور خد براءة..خبر قديم ( انظر البوست السابق)....الخبر الجديد بقى ان المستشار اللى أصدر حكم البراءة مش هو القاضى الأصيل للقضية..ليه بقى ؟ لأن المستشار الأصيل للقضية أحمد عزت العشماوى مات... و أثناء نظر القضية...وبعد أن حبس هانى بيه وجماعته احتياطيا و دخلهم القفص... هذا الرجل الصلب النظيف الذى اشتهر بلقب عدو الفساد ....فجأة جاله مرض غامض كان نتيجته تسمم فى الدم اتنقل بسببه مستشفى شهير فى المهندسين-مشهور بصفاء الجو و ملكيته لأحد وزراء الحكومة- قعد فيه شهرين ومات..ماحدش عارف ليه ومنين وازاى....عيلته بقى لما الفار لعب فى عبها وتحرت فى الموضوع يبدو أنها توصلت الى أشياء جعلتها تنشر نعيه فى ذكرى الأربعين بادئا بالأية الكريمة : "لاتحسبن الذين قتلوا فى سبيل الله أمواتا..بل أحياء عند ربهم يرزقون" .. وتنهىه بقوله تعالى : " ولكم فى القصاص حياة يا أولى الألباب".....صدق الله العظيم
هانى بيه سرور بقى طلع فى صوت الأمة يقول بالفم المليان : "أنا ضحية مؤامرة...و أنا كان مخطط لى أهرب بره مصر بعد أول جلسة..بس اتعرضت لخدعة..فاضطررت أبقى لأواجه مصيرى"...أول مرة فى حياتى أسمع متهم بيعلن بكل بجاحة انه كان مخطط يهرب بره مصر من أول جلسة..ايه الجبروت ده؟ ومين بقى أعضاء تنظيم الهروب ده؟ وطبعا الخدعة انك اتحبست فاضطررت للبقاء..صح؟
بس عموما الغلط مردود ياباشا...و أهو القاضى اتسم...قصدى جاله تسمم فى الدم....ومات...وجه قاضى ضد التسمم..والقفص اتفتح وكله بقى تمام..ورجعت المجلس الموقر وصقفوا لك على واحدة ونص
لو الكلام ده كان من عشر سنين ماكانش ممكن أصدق..لكن دلوقتى باقول ان ده أقل واجب..وبعدين احنا مالنا؟..احنا حانكون أولى بيه من أخوه الدكتور هانى العشماوى-كبير أطباء السكة الحديد- اللى قالوا انه زار وزير العدل عشان يتبرأ من الأقاويل المغرضة و يؤكد ان كله تمام..وعزت مات طبيعى..والحى أبقى من الميت..وأنا برضه دكتور حكومة و فاهم الدنيا.......وعجبى

هو صحيح يادكتور بيع الدم بيكسب قوى اليومين دول؟
..........................................
تربية وتعليم
بدعة سودا انتشرت فى السنين الأخيرة اسمها حفلات البروم فى المدارس الخاصة..الولاد يلبسوا اللى ع الحبل والبنات يلبسوا عريان ويجيبوا مغنى أو مغنية وحفلة فى فندق و شوية صور وهلس ومسخرة..وخلاص
قال يعنى توديع للمدرسة والزملا قبل دخول الجامعة
الجديد بقى السنة دى هو ان الست الرقاصة الدكتورة دينا راحت رقصت فى حفلة "الكوليدج دى لاسال" فى أحد الفنادق الكبرى..وطبعا دينا ماتتوصاش..والعيال هاتك يا تصوير فيها من قدام ومن ورا..مع تظبيط الزوووم ع الأخر..وقامت الدنيا ولم تقعد..وجرى احد المحامين اللى ماسابش حد ف مصر الا ورفع عليه قضية وراح رازعها بلاغ للنائب العام هى والمدرسة والوزارة..
قصتى مش فى البروم ولا المدرسة ولا التربية والتعليم....ده كله بخ من زمان..أنا اللى عايز أفهمه..هو مافيش غير دينا؟
ماتغيروا الصنف بقى...دى حتى بقت قديمة قوى ...مش كل فرقيعة فيها دينا
حسام أبو الفتوح و سيديهاته تلاقيهاا...خناقات مع أثار الحكيم تلاقيها..... رقص فى وسط البلد وتحرش جنسى تلاقيها....حفلات فى مدارس العيال و بلاغات للنائب العام تلاقيها
هى ايه؟
ندر وبتوفوه؟
............................................
سوبر ماركت
توقفت بعربة مشترياتى أمام احدى الكاشيرات فى أحد فروع مترو ماركت .... حسبت السيدة مشترياتى بالباراكود و طلبت مائة وثلاثة وعشرون جنيها ونصف....ناولتها مائة وثلاثين.....أعادت الى خمسة جنيهات و انشغلت فى وضع حاجياتى فى عدة شنط بلاستيكية تحمل شعار المحل..ثم نادت أحد عمال الخدمات قائلة له بلهجة أمرة : " مع الباشا لغاية عربيته"..ثم أتحفتنى بنصف ابتسامة ونظرت الى من بعدى
حين رأتنى أنظر فى ايصال الحساب و أتساءل بعيناى عن مصير الجنيه ونصف الذى لم أسترده..تنحنحت قائلة فيما يشبه الضيق : معلش ياباشا مافيش فكة..ممكن حضرتك تستنى جنبى شوية لما تيجى فكة ..أو تاخدهم المرة الجاية ماهو حضرتك زبون المحل
من البديهى أن تفهموا أنى باعتبارى "باشا" زى ما قرطستنى وحفاظا على برستيجى من الوقفة جنب الكاشير – خصوصا ان اللى ورايا كانت ست حلوة قوى وكلاس- تمتمت قائلا : مش مشكلة .. حاجة بسيطة.....وانصرفت مختارا الحل الثانى باعتبارى "زبون المحل"..علما أنها كانت أول مرة أدخل هذا الفرع و أرى هذه الكاشيرة..
ولكنى حين سمعت "بوس الواوا" تصدح مجسمة عبر أحد الموبايلات..و التفت لأجده موبايل الكاشيرة ال "ان 95" أبو ثلاثة الاف وخمسمائة جنيه.....أدركت أنى لم أكن زبونا للمحل...بل زبونا للست الكاشيرة
......................................................
استقلال
الحقيقة مش قادر أفهم المندبة اللى شغالة اليومين دول ع المدونات عند نوارة ورامز وغيرهم بخصوص خطبة بوش ابن بوش فى الكنيست الاسرائيلى..ووصفه لمناسبة قيام اسرائيل بأنها "يوم الاستقلال" و اعتباره الفلسطينيين ارهابيين وقتلة أطفال.
ايه الجديد يعنى؟
ماهو ده بوش وهى دى أمريكا..ايه الجديد علينا يعنى؟
ع الأقل الراجل صريح...بيقول قدام الكل اسرائيل عشيقة أمريكا.....واسرائيل بتتأوه تحت منه بكل غنج قدام العالم كله
ايه مشكلتنا احنا بقى؟
ماهو حاجة من اتنين:
أول احتمال : اننا غيرانين من اسرائيل ع الزبون...يبقى لأما نروح نعمل نيو لوك وشد ونفخ والذى منه عشان نعجب ( ودى بنحاول فيها و مش نافعين).....أو نمسك الفوطة ونستنى لما يخلص ويستحمى ننشف له وناخد دورنا
ثانى احتمال : ان الشرف والكرامة واخدانا...يبقى لأما نمسك الاتنين عريانين ونلفهم بالملاية ونسكعهم جوز أقلام واحنا بنشدهم ع البوكس...... أونتلم بقى و ندور كلنا على طرابيش مقاسنا تدارى القرون المنبتة فى روسنا

أه ياراسى

13 comments:

الـسـيـدة نـون said...

انا مذبهلة جدا
وعنيا مبرقة
البوست ده جامد اوى يا محمد
جامد بجد يعنى قوى
فى الاسلوب وفى الموضوعات المتناولة فيه
طب تصدق
انا طول عمرى وانا بقرالك ساعات بحس انك ماسك نفسك ومتحفظ
النهاردة كنت سامعة صوتك وانت بتزعق وانت بتضحك ضحكة سخرية وقرف على احوالنا اللى وصلنالها من كل الجهات


المهم
انا قريت تعليقك عندى
واحب اقولك انى مانسيتش ولا حاجة
بس انا عاملة الدعوة دى مش علشان خاطر احمد مهنى
على اد ماهى علشان فيه ناس مشتركين فى الكتاب يهمنى امرهم ويهمنى انى اشجعهم
وكمان فيه احتمال ان حاجة تتنشر ليا فى الكتاب ده
لحد دلوقتى معرفش ايه النظام
اصل فيه خلاف وجهات نظر بينى وبينهم
ومعرفش هما هيرسوا على ايه

اما موضوع احمد مهنا
فانا مستنية اى لحظة اشوفه فيها علشان اقوله رايى الشخصى وجها لوجه
مش مجرد انى اكتب تعليق
او ابعت ايميل
يعنى الموضوع بالنسبالى منتهاش ولسة فاكرة
منستش اى حاجة

المهم
سيبك انت
البوست المرة دى قوى جدا
تحياتى ليك
اختك خيخة

بنت القمر said...

عندي سؤال في مدونتي بعمل في استطلاع رأي
يا ريت تجاوب عليه أن رغبت واكون شاكرة

بنت القمر said...

معلش رجاء مراجعه الرابط التالي للاهميه عشانه انا عملت الاستطلاع
وقلت يمكن اكون انا غلط واراجع افكاري
http://misr-islamiya.blogspot.com/2008/05/blog-post.html
ارجو القراءة بتمهل وتركيز
______________
اديني علقت مرتين علي موضوع واحد اهو
:)
تحياتي
واكيد راجعه تاني

Hypatia said...

محمد
احنا حكومتنا بقت فاجره بكل المقاييس وبتتباهي بفجرها وبتتحدانا واحنا لغايه دلوقتي مش قد التحدي
سواء قضيه الغاز اللى اتباع لعدو اقليمي برخص التراب او اغتيال قاضي شريف بكل بجاحه وفجر واللى عندكو اعملوه سواء فى حالات كتير تانيه بتحصل على مستوي ضيق او واسع قضايا خارجيه وداخليه كل ده لا يدل الا على خيبتنا وسلبيتنا وخنوعنا الشدييييييييييييد
حاجه تكسف فعلا
:(

همسه على جنب:انت مظلوم تدوينيا مش عارفه ليه او لو متحبش كلمه مظلوم يبقي مش واخد حقك أدق0

تحياتي ومودتى

Empress appy said...
This comment has been removed by the author.
Empress appy said...
This comment has been removed by the author.
مروة الزارع said...

أية يا عم محمد جبت كل دة منين بصراحة البوست أكتر من تحفة بجد بجد ويمكن يعتبر من أقوى البوستات إللى قريتها فى حياتى .. تحياتى بجد ليك

Unknown said...

: نوران خيخة
خلاص بقى يا نورا مابقتش مستحملة سكوت وتحفظ...المصيبة ان طعم المر طفح لدرجة ان النفس ذاته بقى طالع مر
.
.
تحياتى ليكى ولشريف و هانى

Unknown said...

:بنت القمر

حصل يافندم

Unknown said...

:نسرين

المجاهرة بالفجور ليس ذنب العاهرة ولكنه ذنب الرجال الذين لم يعودوا رجالا ليعدلوا حالها
.
.
.
ياعزيزتى ربنا يكرمك...أنا مش ممكن أكون مظلوم تدوينيا طول مافيه ناس محترمين زيكوا رأيهم فيا كده

تحياتى

Unknown said...

:رحاب

مبروك الخطوبة..عريسك زى القمر

Unknown said...

:مروة

شكرا يا أم عباس

Anonymous said...

can u leave ur phone number to me???