Share |

January 1, 2009

فى داهية 2009





أيوه 2009



مش 2008



أنا واعى كويس للى عايز أقوله



وماهيش غلطة كتابة



هو ليه المفروض نقول ل 2009 أهلا؟



مين قال اننا أهلها ؟ مين قال اننا عايزينها أساسا؟



مش 2009 دى جاية متحملة بميراث 2008؟



طب ايه هو ميراث 2008 بقى؟


أهلنا اللى اتعفنت جثثهم تحت صخور الدويقة؟ ولا أهلنا اللى اترمت جثثهم فى شوارع غزة ومنعنا دخول الاسعاف ليهم؟


أطفالنا اللى بقينا نبعتهم مدارسهم واحنا خايفين مانشوفهمش تانى بضربة شلوت من مدرس يفش فيهم غله..وبقينا خايفينهم ينزلوا الشارع لا يقابلهم كلب بشرى من كلاب الشوارع؟

أشغالنا اللى بقت مهددة بسبب الأزمة الاقتصادية اللى بيتوقع الخبراء أنها ستحدث كارثة فى مصر العام القادم ولا ملاليمنا اللى فى البنك اللى مابقتش تكفى مصاريف مدارس أطفالنا ولا شوارعنا اللى مابقيناش عارفين الموت مستنينا فى أى شارع فيهم

عربياتنا اللى بقت نعوش متحركة على عجلات ولا قطاراتنا اللى بقت اتجاه واحد نحو المقابر....ولا طياراتنا اللى بقينا بنخلص الفرأن قراية ذهابا وعودة على رحلاتها من الرعب؟


مصانعنا ومسارحنا اللى اتحرقت ولا اللى لسه مستنية دورها؟

مستشفياتنا اللى بقى داخلها مفقود وخارجها مولود ولا مستشفيات الأكابر اللى بيخدموهم خدمة فايف ستارز وهما بيموتوا؟


أكلنا وشربنا وهوانا اللى مليانين سل وسرطان وفيروس سى ولا أكل الكلاب والقطط اللى على رفوف السوبر ماركت العلبة منه بمرتب طبيب متخرج من خمس سنين؟

أطباءنا اللى مش عارفين يعالجونا وبيتعلموا فينا ولا أطباءنا اللى هربوا من للخليج وبينضربوا هناك بالكرابيج؟

رجال أعمالنا اللى همهم يسرقوا مدخراتنا من البنوك وملاليمنا من الجيوب عشان يبعتروها على العشيقات صحوبية وجنس وقتل

ولا بنات أعمالنا اللى بتسهر فى شققها مع أصحابهم الأنتيم يشربوا و يسكروا وفى الأخر يتقتلوا ويترمى بلاهم على واحد مننا احنا الغلابة؟

شبابنا اللى مرمى على كل ناصية وكل قهوة واللى بقى بيشرب بانجو أكتر مابيشرب مية.. ولا بناتنا اللى بقت محتارة بين حجاب لضيق ذات اليد أو هاف ستومك تعلق بيه أى حمار بعربية وتاخد منه 50 جنيه فى الساعة؟

بيوتنا اللى بقت من ورق وحديد مضروب وأسمنت مغشوش واللى بقينا كل ما نقرا عن زلزال ولو فى الصين ركبنا تخبط فى بعضها لانموت تحتها .. ولا كومباوندات الأكابر فى أكتوبر والشروق والتجمع والرحاب اللى فيها البيسين وملاعب الجولف الأمريكانى؟

حكامنا الخايفين ولا حكامنا الخاينين ولاحكامناالمتواطئين ولا حكامنا اللى من غير ذمة ولادين؟


نفرح بسنة جديدة اللى فات ده كله جزء من ميراثها اللى بالتأكيد حاتزوده وتكبره؟

يبقى احنا فينا عقل ولا عندنا ضمير؟


زمان كانوا بيقولوا : استمتع بالسىء فالأسوأ قادم

لكن الحفيفة أنا مش قادر..لأن الموجود بقى الأسوأ...والقادم هو الضياع



9 comments:

šσяšαяαα said...

ممممممممممم

دى دعوة عالية جدااا للتفاؤل واستقبال 2009 بالقلل بدل الورد واللا حتى حزمتين فجل

انا مقدرش اعترض على كلامك

واتمنالك عام 1960 سعيد
اهو ارحم شوية من 2009
:)

صفــــاء said...

.
الله يكرمك يا أخى

انت سودتها من بدايتها

بس للأسف مش بتفترى يعنى

.

Anonymous said...

how can you write a so cool blog,i am watting your new post in the future!

فارس... ولكن....... بلا جواد said...

((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))[الرعد:11]

لم لاتكون ٢٠٠٩ موعد للوقوف على أحوالنا. موعد لنسأل: لم إنهارت الدويقة على أهلها رغم كل التحذيرات والمؤشرات. لم وقفت مصر أمام موقف غزه مضطرة أن تختار أحد خيارين وضعتهم إسرائيل ووضعتها الأحداث و كلاهما كان مر. لم إستمر وزير زراعة عشرات السنين يخرب وبكل ووضوح في أرض مصر دون أن نحرك ساكناً. لم يخرج الملايين للتظاهر من أجل فلسطين ولا يخرجون من أجل إنتخابات كان من الممكن أن تغير مصر و بالتالي كان من الممكن أن تجعل الموقف مختلف. لم رشق العرب سفارتنا بالحجارة ولم يرشقوا القواعد الامريكيه الرابضة في أراضيهم. لم ولم ولم .... نحتاج ٢٠٠٩ وقد نحتاج أطول بكثير لنفهم ماذا نريد وماذا نفعل بأنفسنا. سيدي جاءت ٢٠٠٩ أو ذهبت، تحركت الأيام أم لا، المشكلة فينا نحن

الـسـيـدة نـون said...

مالك متشائم ليييييييه ياحورية

العيش والعيسشة واللى عايشينها مايفوروش الدم يا حورية؟


بدلا من ان تلعن الظلام
امسكى شمعة


تخيل لو كل واحد فينا ماسك شمعة
هنبقى شعب منور



الكوبليه اللى فوق ده
مقطع من مسرحية لمحمد صبحى

مش فاكرة اسمها ايه


المهم يعنى يا محمد
انا شايفة انك متشائم جدا
بس ده مايمنعش ان عندك حق



سلام
اختك خيخة

احساس لسه حى said...

بل ما نتكلم على مواقف غيرنا

نشوف احنا بنعمل ايه وساكتين على ايه

مدونة قطة الصحراء

فى عز ضرب حماس وغزه

والشهداء اللى بتبكى عليهم

بتقول

يبقى حماس والاخوان والجهاد إلى اسفل السافلين

ربنا ينتقم من الحمساوية ومن الاخوان ومن الجهاد

طبعا مفيش اسرائيل ولا امريكا

انا بعتبرها سافله وخايبه وبقول

ربنا ينتقم منها بدم الشهداء

حضرتك بتخش عندها وشايفها ايه

وبلاش نتكلم عن حكامنا وضعفهم

لانكم اضعف من حكامكم بسكتكم وترحبكم بالقذره دى

مستنى رائيك

وموقفك الواضح والحاسم

التدويين راى وموقف

مش صحبة ولمه وتبادل زيارات

بالذات فى موضوع خطير كده
وبلاش تقولى ده راى
دى عمالة وخيانة وقذراة وزبالة

وبلاش نشجب وكمان حتى الشجب بتطالب انه ميزعلهاش

مستنى رائيك فى مدونتى


وده لينك الموضوع والمدونة

http://mshmuwafk.blogspot.com/


سلام

الـسـيـدة نـون said...

انا جاية علشان اشكرك شكر كبير جدا يا محمد

بشكر على تعازيك ليا فى والدى
لانى بصراحة كنت معتقدة ان بعد سوء التفاهم اللى حصل بينى وبينك
انك مش هتدخل عندى تانى فى البلوج

لكن طبعا انت كنت اكبر من اى تصرف خيخى زى ده
وجيت وسبت تعليق تعزينى فيه ورديت كمان على التعليق المجهول

فبصراحة يعنى انا مش عارفة اشكرك ازاى

و اتمنى ان سوؤ الفهم قد زال

وانا مازالت مصرة انه سوء فهم
لان للاسف الايميلات مش بتكون فيها صوت
لانى دايما اعتقد ان نبرة الصوت هى اللى بتخلى الواحد يوصل وجهة نظره للطرف التانى بصورة افضل
فانا اعتقد ان لو كنت شوفتك وجها لوجه وشرحنا لبعض وجهة نظرنا
كنا بقينا فى غنا عن سوء التفاهم اللى حصل بينا

بس عموما يا محمد انا بعتذر وبكرر شكرى
واتمنى انك ماتكونش لسة شايل من جواك منى اى حاجة وحشة

سلام
اختك خيخة

اقصوصه said...

هدي اعصابك :)

الـسـيـدة نـون said...

انا كنت جاية ادحرج التماسى

بقالك كتير مش بتكتب حاجة جديدة ليه؟

سلام
اختك خيخة