Share |

July 13, 2009

ثقافة ال "مستر"... تدوين "الأندروير" وثقافة رفض النصيحة


ثقافة المستر

يرن هاتفى برقم غير مسجل ..أنظر فيه لثوان ثم أرد ..ينساب الصوت الناعم لمندوبة الدعاية فى أذنى : مستر فلان الفلانى...أرد بهدوء لأ حضرتك النمرة غلط .. تعيد الرقم على مسامعى ..أؤكد لها صحة الرقم وخطأ الاسم..فأنا فلان الفلانى بدون مستر

..........................

تتصل بى سكرتيرة أحد العملاء الكبار لتحديد موعد اجتماع ..تسألنى : مستر فلان الفلانى..أرد قائلا أنا المهندس فلان
الفلانى ولست المستر.. من فضلك تأكدى وأعيدى الاتصال

.........................

تخاطبنى موظفة فودافون لتتأكد وأنا أدفع الفاتورة : مستر فلان الفلانى ؟ ألملم نقودى وأهم بالانصراف قائلا أنا فلان
الفلانى..شوفى المستر ده فين وخلليه يدفع لكم

........................

أتجول فى أركان سبينيس سيتى ستارز متسوقا..يلفت نظرى ركن لعب الأطفال..أدخل متفرجا..يشدنى حوار بين اثنين
من البائعين بائعة تنادى زميلها باسمه فيلتفت اليها غاضبا ومتأففا : ماسميش فلان..اسمى مستر فلان

أتأمل هذا المستر جيدا.. يبدو لى شابا بالكاد أنهى دبلوم التجارة أو الصنايع..ويخيل لى سماع زغرودة الحاجة والدته
على باب بيتهم فى الحارة الضيقة فرحا بابنها "المستر
.............................................................................................
تدوين "الأندروير" وثقافة رفض النصيحة

العزيزة نوران الشاملى صاحبة مدونة بنت خيخة وأى كلام نشرت بوستا من بوستاتها التى أتابعها بانتظام رغم تجاوزها بشكل منتظم حدود الكلام القابل للنشر واصرارها على ذلك بدعوى الصراحة وأهمية المضمون مقارنة بالأسلوب....وفى البوست المذكور ذكرت أسماء الملابس الداخلية النسائية الخاصة بأسمائها الصريحة ووصفها الدقيق ولفت نظرى دخول العديد من السادةالرجال للتعليق على هذه النقطة تحديدا وكيف أنهم يحبون المنقط والمخرم واللى من غير..الخ
ولكونى كنت اظن بيننا مساحة من الود و العشم كتبت ردا ناصحا محاولا لفت نظرها الى تلك النقطة وذاكرا لها أننى معتبرا اياها
أختا لى أرجوها ألا تدع الفرصة لتلك النوعية من التعليقات وأنها يمكنها الاشارة الى ماتريده بأسلوب أكثر وقارا وبدون
ذكر الأشياء بمسمياتها الصريحة


وهاجت على الدنيا وتدخلت صديقة لها لتعطينى دروسا فى أصول التدوين وردت على نوران ردا فى منتهى
العدائية ..وأعترف أنى لم أستوعب معنى ردها ولم أتخيل أنها تهاجمنى فرددت عليها مؤكدا معزتى لها ومعتذرا عن
سوء الفهم ..يعنى نصحتها بصدق وأنا اللى اعتذرت فى الأخر


ولكن لأنى لم أستوعب أنها لم تكن تريد أن ترانى معلقا عندها مرة أخرى...وربما رأتنى معلقا بهدوء فغضبت من ذلك

لذلك قررت مشكورة تجريسى

تجريسى لأنى نصحتها كأخت

تجريسى لأنى لم أقل لها تحفة ياخيخة يخرب عقلك ههههههههه أصلى باموت فى الجيبة الشفافة وكل اللى تحتها منقط
أو مخرم أو من غير خالص...........ودى عينة أحد ردود الشباب علي البوست


فماذا فعلت ؟


تفضلت مشكورة بكتابة بوست باسمى الحقيقى واسمى التدوينى بتقول فيه مامعناه الناس مش طايقة كلامك ومش طايقة
ردودك...الخ


وأنا بجد وبصدق باقول لها انى كنت بانصحها كأخت.. وانى باحتسب نصيحتى ليها و سخريتها منى فى بوستها الأخير
فى ميزان حسناتى ان شاء الله ولا أزكى نفسى على الله


وباقول لها حاتفضلى فى قائمة مدوناتى المفضلة رغم كل شىء


وباقول لكل معلقين الأندروير اللى الدم ضرب فى نافوخهم من كلامى : أدعو الله ألا تغضب اذا كتبت زوجتك أو أختك أو


خطيبتك أو بنتك تدوينة بها ألفاظ "تحفة" زى اللى عجبتكم دى



19 comments:

عصفور المدينة said...

من اغرب الألفاظ التي تسمعها حاليا
المستر بتاع العربي أو المستر بتاع القرآن


وعلى أي حال أتضامن معك فيما ذكرته من مشكلة بخصوص ثقافة رفض النصيحة وثقافة الجراءة الالكترونية

Desert cat said...

طيب انا جاية اقولك هاللو يا مستر محمد
ياريت تكون بخير يا مستر محمد
يلا بقى تصبح على خير يا مستر يا محمد

على باب الله said...

يعني المستر بتاع الدبلون ده معزور و الله ، السباك بقى باشمهندس و السواق بقى ريس ، و أنصاف الموهوبين بقوا نجوم ، مستكتر أنت عليه المسترة ليه ؟

يا عم خلي الشباب تهيص

--

Anonymous said...

eamy
مش لاقيه كلمه اقولهالك غير ربنا يكتر من الى زيك مع انهم قليلين انا قريت كلام نوران وبجد استفزنى جدا واستفزتنى الردود وحسيت ان الدنيا عليها العوض لحد ماقريت تعليقك قولت لسه فى بنى ادم محترم مع انهم قليلين

أحساس لسه حى ...أنا مش موافق said...

عزيزى

اول شئ موضوع المستر ميزعلش اهى كلمة ماشية وبكرة تطلع كلمة تانية جديدة

اما عن رفض النصيحة فممكن بس علشان النصيحة كانت ادام الكل

وكمان بدل هى عامله الموضوع ده وكاتبه عنه اكيد كانت متوقعة الردود هتكون ازاى

وعلى العموم انا عجبنى انها كتبت بوست عنك اصلى بحب اللى يجرس اى شئ مش بيعجبه بس اظن هى كده مجرستكش بالعكس اى حد هيقرى الموضوع هيحترم رائيك ونصيحتك

هخش عندها بقه واشوف الموضوع

سلام

أحساس لسه حى ...أنا مش موافق said...

عزيزى

معلش مقدرتش لما قريت السؤال وقريت الاجابة

سؤالك

1- لكن ايه دخل حماس بالموضوع؟

2- وليه ياحنان 95% من معلقينك مجهولى الاسم؟


3- مش انتى عاملة رقابة ع التعليقات؟


4- لوسمحتى انك زى مابتحجبى التعليقات اللى بتهاجمك أو تشتمك - وده حقك طبعا- انك تحجبى التعليقات اللى بتشتم الاسلام والمسلمين.. وده حق دينك عليكى؟


الاجابة بتعتها بقه المضحكة


كل واحد حر فى نفسه يا محمد
اللى عايز يعلق مجهول يعلق واللى عايز يعلق باسمه يعلق واللى عايز يتفرج بس من غير تعليق برضه هو حر

فين بقى التعليقات اللى بتشتم فى الاسلام دى ؟؟؟

سؤالك عن حماس فين

سؤالك عن المجهولين واللى يعلق يعلق مش اجابة وبدل اللى يعلق يعلق ليه عامله حظر وحجب للتعليقات بدل سداح مداح كدة


الاجابة الاخيرة هو فيه تعليقات بتشتم الاسلام يا راجل دى بتسنعماك ولا ايه

جبلها عينات

بجد اجابات مضحكة مش قوتلك معندهاش منطق ورد ضعيفة فكريا اوى

ما علينا

عاوز تمسح التعليق بعد ما تقراه عادى مش هزعل لانه موجهه ليك بس

سلام

Unknown said...

أستاذنا عصفور المدينة

فينك من زمان .. وحشتنا

ههههههههههههه

فعلا فاتتنى دى رغم انى باسمعها كتير من ابنى : مستر العربى ومستر القرأن

فعلا عندك حق فى التعبير بتاع "الجرأة الالكترونية" ده

شرفتنى

Unknown said...

حنان :

هاللو ورحمة الله وبركاته

شرفتينى

Unknown said...

على باب الله :

بجد كان نفسى تشوف الواد البياع مشمئز ازاى لما اتنده باسمه المجرد بدون مستر

منظره بجد كان يحزن

شرفتنى

Unknown said...

eamy :

كتر خيرك وشكرا ع الزيارة بس بجد أنا مش هدفى أشكر فى نفسى أو أذم فى نوران لكن رد فعلها كان مبالغ فيه جدا

على فكرة هى شالت البوست اللى كان مكتوب عنى.. ماعرفش بقى راجعت نفسها ولا حد لفت نظرها ولا شرفتنى بالزيارة وقرت الموضوع

عموما ربنا يهدينا جميعا

شرفتينى

Unknown said...

حسام :

أهلا بيك

بخصوص المستر فهى بجد بتنرفزنى جدا وباقفش منها..تقليد أعمى كأن الكلمة دى هى اللى بتدى الواحد الاحترام...ومندوبى المبيعات بيحاولوا بيها الضحك ع الدقون

بخصوص نصيحتى لنوران فاللى ماتعرفوش انى من حوالى سنة نصحتها ع الايميل مش تعليق فى مدونة وبرضه قفشت منى بس ماكانتش مبالغة قوى كده

هى شالت موضوعها عنى..أنا علقت على بوست "منوعات خيخية" وده اللى نصحتها فيه وبعد كده هى كتبت عنى وبعدين شالت البوست وقفلت تعليقات البوست الأصلى

بعدها على طول كتبت بوست اسمه النظافة من الايمان ياريت تقراه و تشوف الألفاظ اللى فيه لأنى كنت حارجع وأنا باقراه..بس طبعا ما علقتش ولا ليا دعوة

عموما ربنا يهدينا جميعا

........................

بخصوص موضوع حنان:

انت ماخدتش بالك من نصيحتها ليا انى ماسمعش كلام قليلى الأدب والفتانين..تفتكر قصدها مين؟

وبعدين أمسح تعليقك ليه ده انت تشرف دايما ياحسام

تحياتى

أحساس لسه حى ...أنا مش موافق said...

عزيزى

انا لما دخلت اشوف البوست عند بنت خيخة ملقتهوش

وكنت هسالك هو اسمه اسمه ايه وليه محطتش اللينك علشان نشوفه

وكمان البوست اللى عنك فين

كده الصورة وضحت بعض الشئ

تحياتى

سلام

Anonymous said...

awel mara agy 3andak:
7ekayet mr o miss deh 3and el nas elly nasa bas
feh wa7ed beykalemny mn masr 3ashan ashtarek fel long distance call f bey2oly miss sally ma3aya oltelo ah bas balash miss deh,ana ba2ol hena l sa7eb el sherka elly ana feha mike b esmo mn 3'er mr balash el habal elly feko f masr dah
bas te2ol 2eh fakren el e7teram b el alqab
yala bye

اقصوصه said...

مدونه جميله

سعدت بالتعرف عليها

لك ودي :)

مجرد مدونة said...

انا بصراحة كنت عايز اكتب تعليق بس معرفتش اقول ايه .. عموما الموضوع عجبنى :)

couponcode said...

الان نقدم كوبون خصم نون والذي يوفر جميع التخفيضات للعملاء الذين هم بحاجه الي شراء المنتجات وبشكل اسهل واسرع مع توفير كود خصم نسناس يمكنك الحصول عليه فورا ومن اي مكان للتمتع بخدمة افضل واسعار انسب مع متابعة قولدن سنت للعطور للحصول عليه في اسرع وقت ممكن وشراء العطور بجميع انواعها مع خدمات اخري من خلال موقع اي هيرب تعرف عليها الان .

couponcode said...

من خلال موقع جولي شيك احصل الان علي مجموعه مميزة من التخفيضات والاسعار التي يمكن من خلال الحصول علي كود خصم شي ان وتعرف علي المزيد من الخدمات التي نعمل علي توفيرها عبر تخفيضات اناس قم بزيارة الموقع للحصول علي الاكواد عند الحاجه الي شراء المنتجات وتوفير كود خصم ماماز اند باباز تعرف عليه الان للحصول عليه فورا .

couponcode said...

تعرف الان علي خصم سوق كوم واحصل علي المزيد من خلال توفير احدث اكواد وخصومات علي المنتجات من موقع فوغا كلوسيت كما يمكنك الان التعرف علي كود خصم زافول للحصول علي الافضل في اسرع وقت مع تخفيضات هائلة احصل عليها الان ، كما اننا نوفر موقع تجول لحجز تذاكر الطائرات وباسعار مناسبة .

egyptbag said...

خدمات مميزة في توريد شنط في اي مكان في مصر من اجل توفير شنط ظهر للمدرسه تتناسب مع الاولاد والبنات ويمكنك الاختيار من بينهم الاشكال المناسبة وتوفير شنط سفر احصل عليها الان وفي اسرع وقت ممكن من خلال فريق متخصص في صناعة شنط حجاج حيث يمكنك الان التواصل للوصول الي انواع مميزه من شنط دعايا باشكال والوان مميزة للمحلات والمتاجر والعمل علي صناعة شنط هدايا للمناسبات المختلفة باشكال مناسبة والوان زاهية ، مع توفير اخري من شنط لاب توب بقوي ومتانه عالي ة الجودة لتتحمل الانواع المختلفة من اجهزه اللاب توب و توفير شنط رجالي من اجود انواع الجلود .