Share |

December 25, 2007

ياخوفى من الشتا

لما الشتا يدق البيبان
لما تنادينى الكريات
لما المطر يغسل شوارعنا القديمة والحارات
ألقانى جايلك فوق شفايفى بسمتى
كل الدروب التايهة تنده خطوتى
كل اليالى اللى ف قمرها قلبى بات


مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان


كنا طفولة حب لسه ف أوله
بنضم بايدينا الحنين وبنوصله
خريف ندانا والشجر دبلان
بردانة كنتى وكنت انا بردان
ضمت قلوبنا بشوق ولهفة نبضها
لما التقينا الخطوة عرفت أرضها
أجمل معانى الحب غنتها النايات


مش جاى ألومك ع اللى فات
ولا جاى أصحى الذكريات
لكنى باحناج لك ساعات
لما الشتا يدق البيبان


تتصورى
رغم اننا شايفين طريقنا بينتهى..
تتصورى
لا عمرى حاقدر ع الفراق ولا انتى عمرك تقدرى
تتصورى

لسه حنينى بيندهك رغم البعاد
ولسه زهرة حبنا بتطرح معاد
لكن بيغرق حلمنا ف بحر السكات


مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان

10 comments:

مروة الزارع said...

تصوررررررررر اول مرة اشوف الاغنية دى

جميلة بجد اثرت فيا

على فكرة انت احساسك عالى

بجد مش تهريج

Anonymous said...

كويس اتى ماطلعتش لوحدى اللى بيكره الشتا

أغنية جميلة بجد أحييك على اختيارها

نور

MerMaid said...

m5m

أغنية جميلة قوي
بس هي لمين؟؟ ولا من كتاباتك؟؟

كل سنة وانت طيب

الشتا جميل ياراجل

مش ارحم من الصيف و روايحه ؟؟

:))

منور

Nsreen Bsunee said...

انا باموت فى الشتا

الكلام حلو اوى

الاغنيه حلوه اوى

احساسك جميل اوى

تحياتى

جـيـداء said...

الشتا؟

ده حبيبى

m5m said...

mermaid
عزيزتى عروس البحر

أنا مين بس عشان أكتب لعلى الحجار؟
الأغنية دى اسمها " لما الشتا يدق البيبان"..كلمات الشاعر الغنائى ابراهيم عبد الفتاح و ألحان أحمد الحجار وغناء الرائع على الحجار
وصدرت فى ألبوم "أنا كنت عيدك" سنة

1989 تقريبا

يعنى جيل الثمانينات ممكن يكون ماسمعهاش

أما عن الشتا فأنا باموت فيه...باحبه جدا و أخاف منه جدا...زى البحر تمام

شرفتينى وحازورك حالا...جهزى القهوة المظبوط لو سمحتى

m5m said...

نور

أنا أسف جدا ماخدتش بالى من تعليقك
على فكرة أنا مش باكره الشتا بالعكس باحبه جدا لأنه فيه غموض و شجن و حنين...وبيتماشى معى لأنى انطوائى شوية..بس على قد ماحبه باخاف منه لأن فيه ناس كتير ضاعت منى فيه

تحياتى ليك

m5m said...

nsreen bsunee
و أنا كمان باموت فى الشتا....وباموت فى اسكندرية...وباموت فى أمل دنقل اللى لقيته عندك فى مدونتك
مدونتك رائعة
شكرا لزيارتك

m5m said...

جيداء:

وحبيبى أنا كمان

انتى ليه كارهة 2007 قوى كده؟
كلها أيام ربنا

تحياتى

m5m said...

مروة الزارع :-

طبعا أنا رديت عندك فى مدونتك بس برضه لازم تاخدى واجب الضيافة...سكرك ايه؟

معلش أنا سبتك للأخر عشان انتى صاحبتى و أقدر عليكى

ايه الفزع بتاع بوستك الأخير ده يابنتى؟

وحاطة صورة ساطور جزار؟
انتى من جمعية قتل الأزواج؟