لما الشتا يدق البيبان
لما تنادينى الكريات
لما المطر يغسل شوارعنا القديمة والحارات
ألقانى جايلك فوق شفايفى بسمتى
كل الدروب التايهة تنده خطوتى
كل اليالى اللى ف قمرها قلبى بات
مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان
كنا طفولة حب لسه ف أوله
بنضم بايدينا الحنين وبنوصله
خريف ندانا والشجر دبلان
بردانة كنتى وكنت انا بردان
ضمت قلوبنا بشوق ولهفة نبضها
لما التقينا الخطوة عرفت أرضها
أجمل معانى الحب غنتها النايات
مش جاى ألومك ع اللى فات
ولا جاى أصحى الذكريات
لكنى باحناج لك ساعات
لما الشتا يدق البيبان
تتصورى
رغم اننا شايفين طريقنا بينتهى..
تتصورى
لا عمرى حاقدر ع الفراق ولا انتى عمرك تقدرى
تتصورى
لسه حنينى بيندهك رغم البعاد
ولسه زهرة حبنا بتطرح معاد
لكن بيغرق حلمنا ف بحر السكات
مش جاى ألومك ع اللى فات
ولا جاى أصحى الذكريات
لكنى باحتاج لك ساعات
لما الشتا يدق البيبان
December 25, 2007
ياخوفى من الشتا
Subscribe to:
Post Comments (Atom)
10 comments:
تصوررررررررر اول مرة اشوف الاغنية دى
جميلة بجد اثرت فيا
على فكرة انت احساسك عالى
بجد مش تهريج
كويس اتى ماطلعتش لوحدى اللى بيكره الشتا
أغنية جميلة بجد أحييك على اختيارها
نور
m5m
أغنية جميلة قوي
بس هي لمين؟؟ ولا من كتاباتك؟؟
كل سنة وانت طيب
الشتا جميل ياراجل
مش ارحم من الصيف و روايحه ؟؟
:))
منور
انا باموت فى الشتا
الكلام حلو اوى
الاغنيه حلوه اوى
احساسك جميل اوى
تحياتى
الشتا؟
ده حبيبى
mermaid
عزيزتى عروس البحر
أنا مين بس عشان أكتب لعلى الحجار؟
الأغنية دى اسمها " لما الشتا يدق البيبان"..كلمات الشاعر الغنائى ابراهيم عبد الفتاح و ألحان أحمد الحجار وغناء الرائع على الحجار
وصدرت فى ألبوم "أنا كنت عيدك" سنة
1989 تقريبا
يعنى جيل الثمانينات ممكن يكون ماسمعهاش
أما عن الشتا فأنا باموت فيه...باحبه جدا و أخاف منه جدا...زى البحر تمام
شرفتينى وحازورك حالا...جهزى القهوة المظبوط لو سمحتى
نور
أنا أسف جدا ماخدتش بالى من تعليقك
على فكرة أنا مش باكره الشتا بالعكس باحبه جدا لأنه فيه غموض و شجن و حنين...وبيتماشى معى لأنى انطوائى شوية..بس على قد ماحبه باخاف منه لأن فيه ناس كتير ضاعت منى فيه
تحياتى ليك
nsreen bsunee
و أنا كمان باموت فى الشتا....وباموت فى اسكندرية...وباموت فى أمل دنقل اللى لقيته عندك فى مدونتك
مدونتك رائعة
شكرا لزيارتك
جيداء:
وحبيبى أنا كمان
انتى ليه كارهة 2007 قوى كده؟
كلها أيام ربنا
تحياتى
مروة الزارع :-
طبعا أنا رديت عندك فى مدونتك بس برضه لازم تاخدى واجب الضيافة...سكرك ايه؟
معلش أنا سبتك للأخر عشان انتى صاحبتى و أقدر عليكى
ايه الفزع بتاع بوستك الأخير ده يابنتى؟
وحاطة صورة ساطور جزار؟
انتى من جمعية قتل الأزواج؟
Post a Comment